Бу кюнледе Черкесск шахарда, Хорламны кюнюне аталыб, къууанч джыйылыу болду. Аны Сокъурланы бирлешлигини къурамына кирген джергили къаууму къурагъан эди. Анда Уллу Ата джурт къазауатда совет халкъны этген джигитлигине эмда Ата джурт ючюн джан бергенлени сыйларына аталыб, кёб тюрлю джыр джырладыла.

– Бюгюн былайда джырланнган джырла бизге, ёсюб келген джаш тёлюге да белгили болгъан джырладыла. Ала бизни аталарыбызны, аккаларыбызны фронтлада айланнган къыйын джолларын эсгертедиле. Бюгюнлюкде мелхум джашауда рахат тургъаныбызны юсюнде кимден да алгъа аланы къыйынлары уллуду. Бусагъатда да Джуртубуздан узакъда кърал салгъан борчну тыйыншлы толтурур ючюн, джердешлерибиз, джанларын-къанларын аямай, ётгюрлюкню юлгюсюн кёргюзедиле. Ала да, хорламлы болуб, къысха заманны ичинде юйлерине къууанч эте келирле деб, бек ышанабыз. Аны барыбыз да унутмазгъа, джаш тёлюге сингдиргенлей турургъа керекбиз, – деди Сокъурланы бирлешлигини къурамына киргенлени бири Андрей Бердников.
Концертни программасы бай къуралгъан эди. Анда тёлюден тёлюге кёче, кёб джылланы халкъны ауузунда сакълана келген белгили, къайсы бир къауум да бек сюйген, аскер джырланы джырладыла, Ата джуртну эмда къазауатны юсюнден назмуланы азбар айтдыла. Кёзлери кёрмей, къыйын тийсе да, тамам артистлеча, ала кеслерин сахнада таб джюрюте эдиле. Аланы чемерликлерине сейирсиннгенлери тохтамай, былайгъа джыйылгъанла бек джаратыб къарадыла, ёрге туруб харс уруб, джюрек разылыкъларын да билдире эдиле.
Къууанч джыйылыуну ахырында келген къонакъланы, джыйылыугъа къошулгъанланы барысын да шай ичерге тепсиге чакъырдыла.

БАТЧАЛАНЫ Фатима.