Къарачай-Черкес Республиканы Башчысы Темрезланы Рашид МАХ мессенджерде кесини каналында республиканы джамагъатын Уллу Хорламны кюнюне аталыб бютеу Эресейде бардырылгъан «Окна Победы» деген акциягъа къошулургъа чакъыргъанды.

«Бизни республикада хычаман (май) айны 9-ну аллы бла «Окна Победы» деген акция тири бардырылгъаны танылады. Къарачай-Черкесияны джамагъаты терезелени Хорламны белгиси бла, кеслерини Уллу Ата джурт къазауатда болгъан джигитлерини суратлары бла, бюсюреу, махтау сёзле бла джасайдыла. «Окна Победы» акция 2020-чы джыл пандемияны туура къаты заманында къуралгъанды. Ол заманда адамла бир-бирине бармай, кеслери тургъан кёзюуде, Хорламны байрамына къошулургъа излеб, аллай мадар къурагъандыла. Хар джыл сайын акциягъа кёбден кёб адам къошулуб, ол иги адет болуб барады.
Багъалы джердешлерим, бу ашхы ишге тири къошулугъуз! Бизни ата-бабалырыбызны джигитликлерин кёргюзген терезеле кёб болсунла. Сиз аланы сабийле бла бирге джасагъыз, алагъа Уллу Ата джурт къазауатны юсюнден хапар айтыгъыз. Джасагъан терезелеригизни соцсетледе кёргюзюгюз. Бизни эсгериуюбюзню, бюсюреуюбюзню джарыгъы хар юйню да джарытсын!» – деб джазгъанды Темрезланы Рашид.

УЗЕИРЛАНЫ Хусей.