Къарачай халкъны джангырыу кюню Къобан районда да джарыкъ ётгенди.

Районну школлары бла сабий садларында Къарачай халкъны туугъан джуртуна къайтханыны 69-джыллыгъы бла байламлы ачыкъ дерсле, къууанч джыйылыула, сурат кёрмючле, конкурсла, спорт эришиуле, джарыкълыкъ ишле бардырылгъандыла. Устазла сабийлеге тарихни сакълауну магъанасын ангылатхандыла, миллетни маданияты бла шагъырей этгендиле.
Кавказский посёлокдагъы Джаш тёлю аралыкъда, Къарачай халкъны джангырыу кюнюне аталыб, школланы сохталарыны арасында назму окъуу бла джыр айтыудан эришиуле бардырылгъан эдиле.
Эришиуле эки номинацияда (назму бла джыр) къуралгъан эдиле. Анга къошулгъанла назмугъа, джыргъа фахмуларын танытхандыла, миллетни тарихин сыйлагъанларын кёргюзгендиле.
Алайды да, «Назму» номинацияда 1-чи орунну Холоднородниковский элни орта школуну сохталары Байрамукъланы Айша бла Ёзденланы Рауль, 2-чи орунну Привольное элни орта школуну сохтасы Биджиланы Альберт, 3-чю орунну Светлое элни орта школуну сохтасы Эриккенланы Амина алгъандыла.
«Джыр» номинацияда 1-чи оруннга Кавказский посёлокну орта школуну сохтасы Къоркъмазланы Милана, 2-чи оруннга Пристань элни орта школуну сохтасы Хубийланы Кемал, 3-чю оруннга Николаевское элни орта школуну сохтасы Къоркъмазланы Ясмина эмда Мичуринский элни орта школуну сохталары Байрамукъланы Имран бла Найманова Альмира тыйыншлы болгъандыла.
Хорлагъанлагъа Къобан районну администрациясыны Билим бериуню, джаш тёлю политика бла спортну хакъындан управлениеси кубокла бла саугъала бергенди. Ёчлю орунланы алалмагъанла да дипломла бла саугъаланнгандыла.
Хычаман айны 3-де Кавказский посёлокда Къазийланы Хусеинни атын джюрютген джарыкълыкъ юйде къууанч джыйылыу ётгенди.
Анга Къобан районну администрациясыны башчысы Семенланы Ахмат, депутатла, джамагъат эмда дин бирлешликлени келечилери, районну эллеринде джашагъанла дагъыда башхала къошулгъандыла.
«Къарачай халкъны джангырыу кюню бирликни, тюзлюкню белгисиди. Быллай кюнле бизге адетлени сакълауну, аланы тёлюледен тёлюлеге бериуню магъанасын эсибизге саладыла. Кёчгюнчюлюкню джылларында къыйын сынауладан да ётюб, къарачайлыла ана тиллерин, маданиятларын, адетлерин сакълагъандыла. Къарачайлыла туугъан джуртларына къайтыб, мында да джангыдан джашау къурагъандыла, Къарачай-Черкесияны башха миллетлери бла биригиб, туугъан джуртубузгъа ёсюм алдырыб кюрешгендиле. Бюгюнлюкде да республиканы миллетлери ол бирикмекликни тутадыла. Барыгъызны да байрам бла алгъышлай, кючлю саулукъ, насыб теджейме», – дегенди Семенланы Ахмат.
Джарыкълыкъ юйде джыйылгъанлагъа районну маданият бёлюмюню артистлери концерт кёргюзгендиле. Ала туугъан джуртха аталгъан патриот джырлары бла джамагъатха кёз ачдыргъандыла.
Джыйылгъан джамагъат ызы бла кёчгюнчюлюкге аталгъан эсгертмеге гокка хансла салгъанды.

САЛПАГЪАРЛАНЫ Умар.