Эресейни халкъларыны бирлигини джылына эмда Къарачай халкъны джангырыу кюнюне аталыб Нарсана шахарда белгили назмучу, публицист, Москваны Джазыучуларыны союзуну къурамында болгъан, белгили джазыучубуз Баиланы Зулкъарнайны джашы Саидни окъуучула бла тюбешиую болду.
Сёзню сыйлагъан, поэзияны сюйгенлени арасында Саид саулай дуниягъа айтылады, белгилиди. Бизни кёзюуде джазгъан шайырланы ичинде къралла арасында беш онглуну бирине сайланнганды. Орус тилде джазгъан къарачай джазыучуду. Алай демеклик, миллетни тин байлыгъындан, ич хазнасындан, джашау джолундан энчи оюмларын, джюрек сезимлерин саулай Эресейни окъуучусуларына таза орус тилде кескин кёргюзеди. Баи улуну мийик дараджалы поэзиясыны энчи «аудиториясы» болгъаныны юсюнден белгили критик, литературовед Станислав Рассадин джазгъанды. Симфония музыканы ангылар ючюн къуру ноталаны таныгъан азлыкъ этерик болур…
Баиланы Зулкъарнайны джашы Саид Москваны джазыучуларыны сайламаларыны клубуна киреди. Анда Булат Окуджава, Белла Ахмадулина, Андрей Вознесенский дегенча белгили джазыучула болгъандыла. Баи улуну бек джаратхан шайыры Марина Цветаевады, кёб затын азбар биледи, назмуларын, оюмларын ушагъында айтыучанды.
Баиланы Саидни чыгъармачылыкъ ишине аталгъан байрам ингирин джарыкъ этерге Москвадан, Ставрополь крайдан, Къабарты-Малкъар Республикадан, Къарачай-Черкес Республикадан, Нарсананы кесинден джыйылгъанды джамагъат.
Нарсана шахарны башчысы Моисеев Евгений Николаевич, аны биргесине ишлегенле, джыйылыуну бу кюнледе ётдюрюр ючюн, башха джумушланы ары-бери кёчюрюб, не джаны бла да болушлукъ этерге хазырлыкъларын билдиргенлерин айтды Къоркъмазланы Расул, былайыны «Алан» деген бирлешлигини тамадасы. Джазыучуну чыгъармачылыгъына аталгъан ингир биринчи кере болады былайда, ол да бизни миллетден, онглу джазыучубуздан башланнганы, къарачай халкъ Ата джуртуна къайтхан кюнлеге тюшгени да иги ышан болгъанын чертди Расул.
Джыйылыу Миллетле арасы шохлукъну мекямында (Дом дружбы народов) болгъаны бек магъаналыды. Ненча миллетни келечиси сёлешди Саидни чыгъармаларына багъа бериб? Концерт бергенле да тюрлю-тюрлю миллетледен эдиле. Къралыбызны Президенти Владимир Путин быйылгъы джылны Эресейни миллетлерини бирлигине атагъанды, бизде уа хар джылыбыз, кюнюбюз да шохлукъда, мамырлыкъда, бирликде ётеди.
Баиланы Зулкъарнайны джашы Саид Къобан району Ильичёвка элинде туугъанды. 1976-чы джыл, Учкекен элни 1-чи номерли орта школун тауусуб, Москвада МГУ-ну юристлик факультетине киреди окъургъа. Алай а, эси, джаны да адабиятда болгъаны себебли былайын къоюб, Адабият институтха киреди. Бери кирир ючюн не бронь керек болгъанды КъЧАО-дан, неда орус шайырча ётерге керек эди. Саид бронь излеб айланмагъанды, орус шайырча киргенди институтха. Къыркъ эки джылны Москвада джашагъанды, сайлагъан ишине халал къуллукъ этгенди. Бюгюн кюнде Саид Нарсанада, джууугъуну-тенгини арасында джашайды, ишлейди. Ийманлы, саулукълу ёмюр буюрсун Ашхы Аллах!
Былайгъа джыйылгъан джамагъат Баиланы Саидни чыгъармачылыкъ ишине уллу сый бердиле. Хар сёлешген аны фахмусуну чексизлигин, тилини байлыгъын, сёзюню чемерлигин черте эди. Тюбешиуню таб къурагъан, ариу бардыргъан белгили джамагъат къуллукъчу Ёзденланы Шарафатдин эди. Ушакъ магъаналы болса, заман эсленмей кетеди. Артыкъсыз да, сёз, джыр, тепсеу алмашына, чалыша барса. Назмучу бла назмучулукъну юсюнден ушакъны джарыкъ этгенле: КъЧР-ни махтаулу артисти Ёзденланы Кемал, Нарсананы «Скифия» бард-клубуну фахмулу джырчылары, Елдышев Александр, Елена Старовойтова (Къасайланы Осман бла уруш этген аскерчини къызы), Музафаров Сухрат, «Юность Карачая» деген тепсеу ансамблни солисткасы Тамбийланы София, бу мекямгъа ана тилни дерслерине джюрюген сабийле дагъыда башхала. Келген къонакъла Саидни назмуларына, тепсеуге-джыргъа тынгылай, заманларын зауукълу ашырдыла.
Ижаланы Фатима.
