Иги окъугъан, ана тилде ариу сёлешген, миллетлерини ётген джолундан хапарлы болургъа излеген, адебли-намыслы сабийлени кёрсек, къууаннгандан да озуб, башыбыз кёкге джетгенча болабыз.

Кёб болмай аллай, юлгюге тыйыншлы сабийле «Къарачай» газетни редакциясына къонакъ болдула. Огъары Тебердиде 8-чи классны сохталары Кипкеланы Мариям, Байрамукъланы Замира, Джуккаланы Эверест эмда Байчораланы Замир класс башчылары, ана тил бла адабиятдан устазлары Байчораланы Русланны джашы Ринат бла келдиле.
Келген сыйлы къонакълагъа редакцияны коллективи джылы тюбеди. «Къарачайны» баш редактору Къоркъмазланы Салима къонакъланы, къонакъбайланы да, бир-бирлери бла танышдырыб, республикада белгили устазланы бири Байчораланы Ринатха сёз берди. Тюбешиу Къарачайны джангырыу кюнюне аталгъаны бла байламлы Ринат талай магъаналы сёз айтды.
1957-чи джыл газетни биринчи номерин кёрюрге изледиле сохтала.
– Халкъыбыз сюргюнден къайтхандан сора, газетде кимле ишлеб тебрегендиле, ол газет сакъланнганмыды? Газетни андан бери ётген джолундан не айтыргъа боллукъсуз? – дегенча сорууланы бердиле сохтала.
Сохталагъа редакцияны архивинде сакъланнган газетлени кёргюздюк. Айхай да, ала, бек сейирсиниб, талай номерге къарадыла. Газетни атын, редакторун, аны бёлюмлерине кимле башчылыкъ этгенлерин кёзлери бла кёрдюле.
Андан сора аланы тилеклери бла Мамчуланы Дина кесини назмуларын айтды. Сабийле, редакцияны бёлюмлерине айланыб, газетни иши къалай къуралгъанындан хапарлы болдула.
Тюбешиуню аягъында къонакъбайла, къонакъла да бир-бирлерине разылыкъларын билдирдиле, мындан ары да байламлылыкъны тас этмезге келишдиле.

(Бизни корр.).