Халкъыбызны къууанч кюнюнде Къарачай районну эллеринде джыр къанат кергенди. Джарыкълыкъ юйле, эшиклерин кенг ачыб, тёгерекге джарыкъ макъамланы тёкгендиле.

Ташкёпюрде Къарачай халкъны джангырыу кюнюнде Джарыкълыкъ юйню директору Къараланы Лейланы, Ханафийни къызыны, башламчылыгъы бла «Тарих джуртубузгъа къайтханбыз» деген ат бла джамагъатха концерт этилгенди.
Джангы Тебердиде Джарыкълыкъ юй орналгъан орам Эресейни Джигити Боташланы Къанаматны атын джюрютеди. Хычаман (май) айны 3-де аны директору Ортабайланы Мадинаны, Шагъабанны къызыны, башчылыгъы бла тарих дерс бардырылгъанды. Сёз къарачай халкъны ётген бушуулу эмда махтаулу джолуну юсюнден баргъанды.
Огъары Тебердиде Халкъ чыгъармачылыкъны къаласында аны суратлау башчысы Байчораланы Юлияны, Александрны къызыны, башчылыгъы бла ол кюн уллу концерт болгъанды.
Правокубанский посёлокну Джарыкълыкъ юйюнде аны директору Дотдайланы Джульеттаны, Борисни къызыны, башчылыгъы бла «Тёлюлени байламлылыкълары. Къарачай халкъны джангырыу кюню» деген акция бардырылгъанды.
Джангы Къарачай элни Джарыкълыкъ юйюню тамадасы Лайпанланы Гюльнараны, Рамазанны къызыны, башчылыгъы бла элчилеге уллу концерт программа теджелгенди.
Хумара элде Джарыкълыкъ юйню тамадасы Дугужева Лариса Аубекировнаны башчылыгъы бла хычаман айны 3-де Къарачайны джангырыу кюнюне аталыб, «Ата джуртум – мени джюрегимде» деб ушакъ бардырылгъанды.
Къарачай районну башха эллеринде да джыйылыула, концертле ётгендиле.

(БИЗНИ КОРР.).