Къарачай-Черкес Республикада, Эресейни халкъларыны бирлигини джылына эмда Къарачай халкъны джангырыууна 69 джыл толгъанына аталыб, уллу чаришле бардырылдыла.

Джангур себелей тургъанына да къарамай, хычаман (май) айны 2-де Джёгетей Аягъыны ипподромунда кёб адам джыйылгъан эди. Алайда Эресей Федерацияны сенатору, Кърал Думаны депутатлары, Къарачай-Черкес Республиканы Халкъ Джыйылыууну (Парламентини) депутатлары, толтуруучу властны органларыны тамадалары бла къуллукъчулары, Къарачай-Черкесияны шахар округлары бла муниципал районларыны башчылары, шахарладан, элледен келген адамла бар эдиле. Къарачай-Черкесия бла Ставрополь крайдан ачыкъ спорт эришиулеге 100-ден аслам атлы къошулгъан эди.
Чаришлеге къошулгъанла, кючлерин, къарыуларын аямай, алчы орунланы алыргъа кюрешдиле. Ала атларын 1000 метрден башлаб, 3600 метр узакълыкъгъа дери джети кере чабдырдыла. Чаришле бошалгъанларында белгили сюдюле, алчыланы, ёчлю орунланы алгъанланы белгилеб, саугъаладыла.
Джуртну къоруулаучулагъа аталгъан эришиуледе (мында юч джылгъа дери таза ингилиз тукъумлу атла чабхан эдиле) Лепшокъланы Кемалны «Аргомак» аты хорлады.
Халкъыбыздан кёчгюнчюлюкде ёлгенлени эсгериуге аталгъан чаришледе (ол чабыуулгъа таза къарачай тукъумлу атла къошулгъан эдиле) Кутлалиев Мухамматны «Асмар» деген аджири алчы болду.
Къарачай-Черкес Республиканы Башчысыны ёчюне, Къарачай халкъ джуртуна къайтханлы 69 джыл болгъанына аталыб бардырылгъан эришиуледе (анда къуру къарачай тукъумлу атла бар эдиле) Каппушланы Умарны «Ангарск» аты биринчи оруннга чыкъды.
Эресейни халкъларыны бирикмеклигини джылына аталгъан эришиуде (анда ингилиз тукъумдан къалгъанла бары да бар эдиле) Мырзаланы Хусейни «Выстрел» аты биринчи орунну алды.
Реабилитация этдириб, къарачай эмда башха халкъланы джуртларына къайтарыугъа уллу юлюш къошхан адамланы эсгериуге аталыб къуралгъан эришиуледе (ары ингилиз тукъумлу атла къошулгъан эдиле) Николай Громовну «Бармалей» деген аты биринчи болду.
Эресей Федерацияны Джигити генерал-майор Боташланы Хусейни эсгериуге аталгъан эришиуледе (анда ингилиз тукъумлу атла чабхан эдиле) Къаракетланы Муратны «Меин Кэнди» деген байталы хорлады.
Эресейни Халкъларыны шохлугъуну ёчюне аталыб къуралгъан ат чабдырыуда биринчи орунну (анда ингилиз тукъумдан къалгъанла бары да бар эдиле) Текеланы Туугъанны «Джихат» деген аты алды.
Ол къууанч джыйылыуда бардырылгъан ат спорт эришиуледе-чаришледе хорлагъанланы саугъалагъанла, толтуруучу властны органларыны тамадалары, чаришлени къураргъа, бардырыргъа болушханла, Эресейни бютеу халкъларыны биригиулерини, тарих тюзлюкню сакълауда, ат спортну бирикдириуде, белгили этиуде, агъачлы атчылыкъны адетлерин сакълауда, ёсдюрюуде быллай чаришлени терен магъанасы болгъанын чертиб сёлешдиле.
Байрам баргъан кёзюуде республиканы чыгъармачылыкъ коллективлери концерт кёргюздюле, белгили артистле тепседиле, джырладыла.
Джыйылгъанла, Къарачай-Черкесияны Башчысы Темрезланы Рашидге, КъЧР-ни Правительствосуна, Джёгетей Аягъы районну администрациясына, «Къарачай – алан халкъ» джамагъат бирлешликни тамадасы Хубийланы Хасаннга, аллай ашхы спорт эришиулени къурагъанлары ючюн, уллу бюсюреу этиб, разылыкъларын билдирдиле.

Лепшокъланы Хусеин.