Къарачай халкъны джангырыу кюнюнде республиканы башха районларындача, Гитче Къарачай районда да кёб иш этилгенди. Сёз ючюн, Къарачайны кёчгюнчюлюкде ёлген адамларын эсгериуге аталыб салыннган эсгертмени аллында уллу джыйылыу болгъанды. Алайгъа властны органларыны, закон-джорукъ сакълаучу структураланы къуллукъчулары, джамагъат эмда дин бирлешликлени келечилери, СВО-да болгъанла, районну къартлары, Къабарты-Малкъар Республиканы делегациясы, районну къарты, джашы да джыйылгъанды.

Ара меджгитни имамы, кёчгюнчюлюкню джолунда ёлген джердешлерибизни эсгере, дууа этдиргенди. Джамагъатны аллында тургъан дагъыда талай адам сёлешгенди.
«Къарачай халкъны джангырыу кюнюню терен магъанасы барды. Ол адамланы тёзюмлюлюклерин, джигитликлерин, бирикмекликлерин, Джуртха кертиликлерин кёргюзеди. Онтёрт джылны кёчгюнчюлюкню азабын сынаб, 1957-чи джылны хычаман (май) айыны 3-сю, халкъыбыз туугъан джуртуна къайтхан кюн, халкъны эсинде турлукъду. Ол кюн тарих тюзлюкню белгисине саналады.
Бюгюнлюкде тарихибизни унутмай эсде тутууну терен магъанасы барды, аны келлик тёлюлеге да айта, билдире барыргъа керекди. Районда, республикада, уллу къралыбызда джашагъан халкъланы араларында шохлукъну джая, ангыламакълыкъны, кертиликни кючюн бегитиб турургъа тыйыншлыды.
Багъалы джердешле! Къарачай халкъны джангырыу кюню бла барыгъызны да алгъышлайбыз. Уллу Аллах барыбызгъа да рахат, мамыр джашау, къууанч, насыб берсин деб тилейбиз», – дегендиле ала.
Андан сора да районну Къасайланы Османны атын джюрютген Джарыкълыкъ къаласында байрамгъа аталгъан концерт болгъанды. Ол иш да районну адамларын бирикдириб, халкъны тин, иннет кючюн, ашхы адетлерини, адебини-намысыны мийик дараджасын кёргюзгенди.
Концертни ишине чыгъармачылыкъ коллективле, белгили джырчыла, тепсеучюле дагъыда башхала къошулгъандыла. Алайгъа джыйылгъанла ол кюн тарих бла байламлы затланы эсгериуден сора да, рахат, мамыр джашауну, бирикмекликни, шохлукъну, патриотлукъну, Джуртха кертиликни кюню болгъаннга санагъанларын черте эдиле. Ала, биз халкъыбызны адебин, намысын, ашхы адетлерин, тилин тутаргъа борчлубуз, дегенни айтыб, бютеу ашхы адамлагъа игилик, рахатлыкъ, насыб джашау теджей эдиле.
Андан сора да, Гитче Къарачай районну администрациясыны мекямыны аллында джамагъат, джыйылыб, уллу той бардыргъанды. Адамла бир-бирине ышара, кюле, тепсей, уллу, гитче, эркиши, тиширыу да биригиб, рахатлыкъ, мамырлыкъ, джюреклени учундургъан къууанч орун алгъанды. Ёсюб келген джаш адамла кёб ашхы затха юренирге мадар табхандыла.
Уруп районда да къуралгъанды талай ашхы иш. Пхия посёлокну эл библиотекасында уллу, гитче джыйылыб, «Здесь наших предков дух и созидание» деген темагъа ачыкъ ушакъ этгендиле.
Преградна стансени Ара паркында, политика репрессияны джолунда ёлгенлеге аталыб салыннган эсгертмени аллында, уллу джыйылыу болгъанды. Алайда власть органланы, джамагъат бирлешликлени къуллукъчулары эмда башхала сёлешгендиле. Джыйылыуну аягъында адамла эсгертмеге гокка хансла салгъандыла. Тюрлю-тюрлю халкъланы арасында шохлукъну кючю бегий, адамланы бирикдирген мадарла къуралгъандыла.
Анда Ара район библиотекада «Живи и процветай, мой Карачай!» деген ат бла кёрмюч ачылгъанды.
Ол кюн дагъыда Медногорский посёлокда Санатланы сабий школунда, къарачай халкъгъа аталыб, «Несгибаемый, гордый народ…» деген ат бла Урупну радиосунда информацион бериуле бардырылгъандыла.

Узеирланы Хусей.