Юй тюбюнде шиндикде
Анам билезик ийиред.
Джукъу арада урчугъун,
Тобугъуна тийире.

Кючю уллу билезик –
Хар тюкчюгю алтынданд.
Къыйын кюнде халкъымы
Джанын ачдан къалдыргъанд.

Къарачайны джазыуу,
Джолу къыйын, джарсыулу.
Тауларынг, таш къаяла,
Къазауат, эминала.

Энчи бушуу бла къуугъун
Келиб кирди миллетге.
Джуртун къоюб, бютеулей
Керек болду кетерге.

Къазауатда джашлары,
Джан аямай сермеше.
Къарыусуз къартларынгы
Вагонлагъа юлеше.

Джарлы анала, сабийле,
Онгсуз къартла бла бирге.
Ашырылыб сюргюннге –
Къазакъ, къыргъыз тюзлеге.

Исси хауа джарашмай,
Ауруу табдыла кёбле.
Зорлукъгъа чыдаялмай,
Джан бердиле къум тюзде.

Къыйынлыкъны сынадынг,
Джазыуунга ёкюнмей,
Деуча тёздюнг, сынмадынг,
Умутунгу тас этмей.

Саулай онтёрт джылынгы,
Сен джеринге термилдинг.
Хауанг бла сууунгдан,
Балхам уртлам кюсединг.

Тюзлюгюнге сен базыб,
Тауларынга къайтханса.
Къум тюзде къалгъанлагъа
Сен джаназы къылгъанса.

Муал тарих терегинг
Энди чыммакъ чакъгъанды.
Къабыл болуб тилегинг,
Муратларынг толгъанды.

Байрам бла, къууанч бла,
Мени сыйлы миллетим!
Биргенгеди, сени блад
Муратларым, иннетим!

Ёзденланы Фатима.