Миллетибизни не тюрлю чурумунда да нартюх гырджынны къууанч тепсиге эм сыйлы баш хантла бла тенг салыб тургъандыла. Аны тышында да, узакъ джолоучу болгъан адамгъа, чалкъыны кёзюуюнде чалкъычылагъа дагъыда алача кюч джетген джумушланы этиб айланнган адамны къолуна азыкъгъа нартюх гырджын бла джууурт айранны салыучу болгъандыла халкъыбызда.

Аны дамлыгъыны, адамгъа къарыу бергенини юсюнден джашауда кёб затны сынагъан акъылман къартларыбыздан эшитгенлей тургъанбыз. Медицина къуллукъчула да аны адамны саулугъуна уллу хайыры болгъаныны юсюнден билдиргенлей турадыла.
Бюгюнлюкде нартюх гырджынны айран бла ашаргъа къайсы бирибиз да огъай дерик тюлбюз, алай болса да, юйде неда хант биширген бирси джерледе аны хазна этмейдиле. Эриннгенденми огъесе башларгъа къыйынды деб базмаймы къоядыла, белгисизди чуруму. Этген а къайсы бирибизге да къыйын тюлдю, этиб кёрмесенг иги ангыламайса. Алайды да, нартюх гырджынны хар адам да кесини джюреги сюйгенча эте болур, алай а, къарт аналарыбызны сынамларындан юреннгенибизни окъуучуларыбызгъа теджерге излейбиз.
Нартюх гырджынны башларны аллы бла анга керекли затланы мардалаб бир джанына салыб, хазырларгъа керекди. Сёз ючюн, бир адамгъа теджерча бир гырджынны этер ючюн 150 грамм нартюх ун, 100 грамм суу, бир атым туз, 10-15 грамм къуйрукъ джау керек боллукъду. Алайды да, терен табакъда нартюх унну арасын чунгур этиб, анга туз атаса да, къайнай тургъан сууну къуя, къалакъ бла да булгъай, тылы бола тебрегенлей, къалакъны къоюб, къолунг бла къатышдыраса, ийлеб тамам келишгенлей, аны джазгъыч бла джаяса да, отда къызгъан табагъа салыб, эшиги джабылгъан къызгъан печде (духовкада) 10-15 минут чакълы биширесе. Ол, бек къууурулмай, къызылсыман ариу бет алыргъа керекди. Тамам алай болгъанлай, печден чыгъарыб, сындырыб саханнга джарашдырыб, къатына да гоппан бла джууурт айранны салыб сыйлы къонагъынгы сыйларгъа боллукъса. Аш татлы болсун!
Бизни ата-бабаларыбыздан келген сыйлы хантланы бири нартюх гырджын болгъанын ёсюб келген джаш тёлюге ангылатханлай, этерге юретгенлей, хар къарачай юйдеги да хант юйюнде тепсиден къурутмай турургъа керекбиз. Алай бла, бурун берекетибизни, тин байлыгъыбызны сакълай барлыкъбыз деб ышанабыз.

Рубриканы БАТЧАЛАНЫ Фатима бардырады.