Арттотур (апрель) айны 15-ден хычаман (май) айны 20-на дери, СССР-ни халкъ артисти, композитор Григорий Пономаренкону чыгъармачылыгъына аталыб, саулай Эресейде «А где мне взять такую песню» деген акция бардырылады. Ол «Культура для школьников» деген ведомствола арасы маданият-окъуу проектни тамалында къуралгъанды.

Григорий Пономаренкону чыгъармачылыгъы Ата джуртубузну музыка тарихинде энчи орун алгъанды. Анга аталгъан акция Эресейни миллет музыка байлыгъын сакълар, аны эсде сакълар, джаш тёлюню къралыбызны маданияты эмда санаты бла шагъырей этер мурат бла бардырылады.
Акциягъа Эресейни школларыны сохталары къошулургъа боллукъдула. Ала кеслерини фахмуларын талай номинацияда кёргюзюр мадар табарыкъдыла – «Голос души» (Григорий Пономаренкону вокал чыгъармаларыны бирин джырлау), «Музыкальный обозреватель» (Григорий Пономаренкону джырларында джаратханыгъызны юсюнден кёлюгюзге келгенни джазыу), «Хореография» (белгили композиторну музыкасына тепсеу хазырлау), «Инструментальное творчество» (Григорий Пономаренкону чыгъармаларыны бирин согъуу).
«А где мне взять такую песню» акциягъа къошулургъа излеген сохтала, башында айтылгъан номинацияланы биринде неда талайында кеслерини ишлерин хазырлаб, хычаман айны 20-на дери культурадляшкольников.рф порталда тилек къагъыт берирге керекдиле.
Ахырында эксперт комиссия 100 эм иги ишни сайларыкъды. Ала культурадляшкольников.рф порталгъа салынныкъдла.

САЛПАГЪАРЛАНЫ Умар.