Къарачай-Черкес Республиканы орузламасында хычаман (май) айны 3-сю айырыб тарихге тюшюрюлген кюндю. Ол къарачай халкъны джуртуна къайтхан кюнюдю, таукелликни, бирикмекликни белгисиди.

Джылладача, быйыл да анга аталыб бардырылгъан къууанч джыйылыу Садовое элде да болду. Ол джарыкъ байрамгъа Черкесск шахардан да къонакъла келген эдиле. Аланы арасында «Къарачай – алан халкъ» джамагъат бирлешликден Боташланы Сулайман бла Алийланы Мухтар да бар эдиле.
Школну директору Блимгъотланы Эльвира, къонакълагъа хошкелди айта, джыйылыу байрамгъа аталгъанын айтды. «Къарачай – алан халкъ» джамагъат бирлешликни тамадасыны орунбасары Боташланы Сулайман джыйылгъан джамагъатны байрам бла алгъышлаб, рахатлы джашау теджеди. Миллетибизни джангырыу кюнюне атаб, элни сыйлы къартына Блимгъотланы Умаргъа медаль такъды.
Къарачай халкъны маданиятыны байлыгъын кёргюзте, джырлай, миллет тепсеулени тепсей, адамла къууанч этдиле.
Аны тышында, алайда адамланы арасында патриотизмни, бирикмекликни, шохлукъну кючю кесин танытды.
Джангырыуну кюню халкъ анга джетген къыйын сынауну тыйыншлысыча ётюб, кесини адабиятын, маданиятын, тилин, ийнанмакълыгъын тас этмей сакълагъанын кёргюзеди.

(Бизни корр.).