Джюрек оту тауланы джарытыб, хар адамгъа игилик излеген белгили алим эди Къоркъмазланы Юнюсню джашы Альберт. Ол, къарнаш шохлукъну деу кючюн къатлай, джашау джолунда чыгъармачылыкъ ишинде алтын гюл чакъдыргъанды.
Альберт 1934-чю джылны къыркъар (август) айыны 28-де Къарачай шахарда Юнюсню халкъны ашхы адетлерин багъалатхан, адебин, намысын тутуб джашагъан ашхы юйдегисинде туугъанды. 1955-чи джыл орта школну кёчгюнчюлюкде Къыргъыз ССР-ни Фрунзе областыны Кировский районунда Грозный элде бошагъанды. Урунуу джолун анда эл школда устаз болуб башлагъанды. Кёчюрюлген халкълагъа эркинлик берилиб, 1957-чи джыл Къоркъмазланы юйдегилери халкъ бла бирге Кавказгъа къайтады. Альберт мында 1963-чю – 1965-чи джыллада Джёгетей Аягъы станседе орта школну директору, андан сора пропаганда бла агитация бёлюмню тамадасыны орунбасары, КПСС-ни Къарачай-Черкес обкомуну школларыны эмда окъуу заведениелерини тамадасы болуб тургъанды. Альберт, билимин андан ары ёсдюрюрге излеб, С.М. Киров атлы Азербайджан кърал университетге тюшюб, аны филология факультетин тауусады. Баш билими болгъан джаш уста, андан сора 1970-чи джыл Москвада (басманы, радиону, телевидениени къуллукъчуларыны бёлюмюн) КПСС-ни Ара комитетинде баш партия школун бошайды. Фахмулу, билимли уста, билим джолда андан ары учуна, 1970-чи – 1973-чю джыллада КПСС-ни АК-де баш школну аспирантурасында окъуйду. Аны 1970-чи джыл Къарачай-Черкес автоном областны китаб басмасыны тамада редактору къуллукъгъа саладыла. Бир кесекден китаб басманы директору этедиле. Ол 1974-чю джыл, «Гуманизм» деген темагъа кандидат диссертациясын джакълаб, филология илмуланы кандидаты атха ие болады. Усталыгъыны юсю бла илму-тинтиу ишле бардыра, бу санагъатха хайыр келтирген кёб джангы зат этеди. Аны илму ишлери тюрлю-тюрлю кърал басмаладан чыгъадыла.
Альберт 1976-чы джыл Ставрополдагъы къурулуш институтха (бусагъатда Шимал Кавказ кърал федерал университет) ишге киреди. Биринчи тамада устаз, доцент, илму коммунизмни кафедрасыны тамадасы, болуб ишлеб турады. Аны 1966-чы джыл философия кафедраны профессору этедиле.
1998-чи джыл ол «Этнополитические процессы и их специфика на Северном Кавказе» деген темагъа доктор диссертациясын джетишимли джакълаб, социология илмуланы доктору болады. Асламысына илму ишлерин джамагъатны иннет, акъыл байлыгъыны, адебини, намысыны юслеринден этиб кюрешеди. Белгили алим, андан сора этнополитика ишлени: табигъатны, регионну ёсюмюню къалай барыууну юсюнден да кёб илму иш джазгъанды. Ол 70-ден аслам илму ишни авторуду. Аланы арасында 3 монографиясы барды. «Гуманизм в действии» Черкесскеде 1977-чи джыл чыкъгъанды. «Этнополитические процессы на Северном Кавказе. История и современность» Ставрополда 1994-чю джыл басмаланнганды. «Этнический фактор в политической жизни Северного Кавказа» Москвада 2002-чи джыл чыкъгъанды.
Кърал аны, джамагъатха хайыр келтирген ашхы илму чыгъармачылыгъына багъа бере, кёб саугъа бла белгилегенди. Аланы арасында В.И. Ленинни медалы, башха саугъалары бардыла.
Альберт Шимал Кавказ кърал техника университетни эмда Ростовда Къыбыла Эресейчи гуманитар институтну сыйлы профессору эди. Шимал Кавказ кърал технология университетни эмда Ставрополь кърал университетни кандидат, доктор диссертацияланы джакълагъан алим советини къурамында эди. Аспирантланы, соискателлени илму тамадалары, ала диссертацияларын джакълагъан сагъатда оппонентлери болуб тургъанды. Ол 2002-чи джыл къыркъаууз (сентябрь) айны 9-да ауушханды, джандетли болсун.
Аны адамлагъа хайыр келтирген, регионну ёсюмюне энчи юлюш къошхан ашхы илму ишлери бюгюнлюкде да хайырландырыладыла.
Альберт уллу адамлыкъны, ишленмекликни юлгюсю эди. Таза джюреги алгъа таукел учуна, бирикмекликни, сюймек-
ликни, кертиликни, къарнаш шохлукъну кючюн тёгерекге джая джашагъанды.
Лепшокъланы Хусеин.
