Алтотур (март) айны 27-ден бери Доммайда «Межкультурный диалог – 2026» деген халкъла арасы джаш тёлю форум барады.

Анга, ДНР бла ЛНР-ни келечилери да ичлеринде болуб, Эресейни 9 регионундан 100 тири джаш адам къошулгъанды. Алагъа бек аламат программа къуралгъанды. КъЧР-ни Миллет ишлерини, кёбчюлюк коммуникациялары бла басмасыны хакъындан министерствосуну Джамагъат эмда дин бирлешликле бла иш джюрютген бёлюмюню тамадасы Фаина Куршева бла КъЧКъУ-ну джаш тёлю политиканы хакъындан проректоруну къуллукъ борчларын толтургъан Бостанланы Эльдар биринчи кюн огъуна джаш адамланы ол программа бла шагъырей этгендиле.
МГУ-да бусагъатдагъы социал илмуланы баш школуну илму ишлени хакъындан директоруну орунбасары, экономика илмуланы доктору Александр Александрович Гребенюк джаш адамлагъа «Социальные технологии управления людьми: от информации к модели поведения» деген темагъа лекция окъугъанды.
Айтылгъан психолог эмда юретиучю Роберт Русланович Баскаев да къауумну къурамында ишлерге юретгенди.
Эки уста да оюн халда юрениуле, сынаула теджеб, джаш адамланы билимлерин ёсдюрюрге учундургъандыла.
«Культурные и самобытные традиции народов России» деген акъыл оюннга къошулгъанла уа, тамам да бек къызыныб, хар тюз джууабларына «той» тута эдиле.
Алай бла, джаш адамла, бир-бири бла шагъырей бола, джангы шохла къурай, билимлерин да ёсдюре, КъЧР-ни джомакълы джеринде заманларын файдалы ашырадыла.
Форумну тамалында ала энтда тюрлю-тюрлю сессиялагъа, экспертле бла ачыкъ ушакълагъа, джарыкълыкъ ишлеге къошуллукъдула.
Джаш адамланы бирикмекликге кёллендирген, аланы билимлерин заманны излемине кёре ёсдюрюрге джораланнган ишни, Эресейни Миллет ишлени хакъын-
дан федерал агентствосу кёлтюргючлюк этиб, КъЧР-ни Миллет ишлерини, кёбчюлюк коммуникациялары бла басмасыны хакъындан министерствосу къурагъанды.