Арттотур (апрель) айны 28-де Гара Суула шахарда Эресейни регионларын да, шох къралладан табышлылыкъ бла кюрешгенлени да бирикдирген Кавказ инвестицион форум башланнганды.

Аны юсюнден КъЧР-ни Башчысы Темрезланы Рашид МАХ мессенджерде кесини каналында: «Джылдан джылгъа Кавказ экономика бла байламлы ишледе алгъа чыгъа барады. Мында туризмге ёсюм алдырыргъа, инфраструктураны таб джарашдырыргъа аталгъан уллу проектлени джетишимли толтурур мадар барды. Кёб джерге баргъан джолланы арасында орналгъаны да Кавказгъа ёсюм алыргъа онг береди.
Бу форумгъа къошулуб, Къарачай-Черкес Республика ол хыйсабын кёргюзюрге, иш нёгерлери бла араны бегитирге, башха инвесторланы да магъаналы проектлени бирге толтурургъа кёллендирирге боллукъду.
Быйыл бизни регион анда экономикабызны айнытыргъа джарарыкъ ишле бла байламлы башламчылыкъланы кёргюзеди. Аланы арасында «Архыз» аэропорт комплексни къурулушун айырыб чертерге тыйыншлыды. Аны юсюнден эм алгъа эки джылны мындан алда бардырылгъан Кавказ инвестицион форумда сёлешиннген эди. Бюгюнлюкде биз аны ишлей башлагъанбыз. Ол толтурулса, регионну туризми да, экономикасы да бирден айнырыкълары хакъды.
Кавказ инвестицион форумда джердешлерибизге джангы иш орунла ачаргъа джарарыкъ проектлени толтурургъа кёлтюргючлюк этерик инвесторла бла кесаматла этербиз деб, ышанама.
Алай бла, Къарачай-Черкесияны хыйсабын ёсдюре, акъырын-акъырын алгъа барабыз», – дегенди.