Мындан алда Къарачай-Черкес Республиканы Башчысы Темрезланы Рашид Россияны Правительствосуну Председатели Дмитрий Медведев бла, Россияны регионларыны тамадалары бла тюбешгенди.

Анда сёз бюджетле арасы ёсюмню таб, бирча джарашыулу турурча этиуню ишлерине къаралгъанды. Ол тюбешиуде инфраструктура тыйгъычланы къоратыуну юсюнден да сёлешгендиле.
Премьер-министр Россияны Правительствосу россиячы регионланы халларын иги этиуню, бирча тутууну юсюнден алгъан планларыны хакъындан айтханды.
«Эм биринчи айтырым, биз федерал бюджетден юлешгенибизни джашырмайбыз, къайры не зат кетгенин ачыкъ этебиз. Хал ким да билирча, кёрюрча тазады. Алай болур ючюн, озгъан джыл федерал аралыкъ бла регионланы араларында келишиуле этилген эдиле. Субсидияны юч джылгъа юлешиуню юсюнден да сёлешген эдик. Регионла финанс джаны бла тюз политика бардырыб, планларын кеслери сюйгенча таб джарашдырыргъа боллукъдула. Биз мындан ары да аллай мурат бла ишлерге кюреширикбиз», -дегенди Дмитрий Медведев.


Премьер-министр айтхандан, регионла экономика кючлерин кеслери ёсдюрюрге керекдиле. Россияны Правительствосуну бегимине кёре озгъан джылдан башлаб, ёсюмню мийик дараджасын кёргюзген регионла 20 миллиард сомгъа грантла аладыла. Быйылдан башлаб, халны иги этген джангы тёлеуле боллукъдула. Регионал бюджетлеге организацияланы этген хайырларындан алыннган налогла къайтарыллыкъдыла.
«Экинчиси, келир джылдан башлаб, бюджет ачханы юлешген сагъатда джерлени налог тёлеу кючлерин тергегенден сора да регионал, джергили властланы орта россия дараджада финанс джоюмланы этерге эркинлик берген излемлери да эсге алынныкъдыла. Энди дотация бериуню объёму аллай джорукъ бла юлешинникди.
Ючюнчюсю, федерал, регионал, джергили эркинликлени юсюнде орун алгъан эски проблеманы оноуун, «эт да, тиш да кюймезча», таб этерге кюрешебиз. Законда федерал дараджада бегиген эски мардаланы, ёлчелени тазалауну уллу магъанасы барды. Регионла кеси оноуларын кеслери этерге эркин болургъа керекдиле. Ол зат регионланы энчи джууаблылыкълары болгъанын айырыб айтыргъа излейме. Бютеу къралгъа керекли бирча джорукъ салыргъа тыйыншлы джерде, федерал аралыкъгъа, регионлагъа да келишген политика бардырыб, хар затны тюз этерге борчлубуз. Бюджетлени араларында келишиуню заманны излемине кёре джарашдырыу, къралыбызны 2025-чи джылгъа дери ёсюмюню стратегиясы бла  байламлы болургъа керекди», - дегенди дагъыда Дмитрий Медведев.
Тюбешиуню аягъында Премьер-министр, алайда айтылгъан оюмланы сюзюб, тыйыншлы бегим алыргъа Правительствогъа аманат этгенди.

 
{jcomments}