Алтотур (март) айда телевизорла бла саулукъ сакълау санагъатны джумушлары бир да багъа болгъандыла, санаторийде саулукъ тюзетгенле уа путёвкаланы багъаларына къууаннгандыла.

Росстат билдиргеннге кёре, быйыл алтотур (март) айда Къарачай-Черкесияда хар нени багъасы, озгъан джылны байрым (февраль) айы бла тенглешдиргеннге, 0,8 процентге ёсгенди. Аны баш чуруму хар не чыгъаргъанла бла келтиргенле, бизге кереклини теджер ючюн, асламыракъ ачха джойгъанлары бла байламлыды.
Ашарыкъ продукталаны арасында гаккыла, айырыб кёзге кёрюнюрча, багъа болгъандыла. Байрамны аллы бла болуучанды алай. Къанатлыла тутханла да, гаккыланы джер-джерге ташыгъанла да, не тюрлю джоюмларын да тергеб, салгъандыла ол багъаланы.
Чёблеу джауну багъасы уа тюшгенди, дейдиле. Чуруму – заводла асламыракъ джау чыгъарыб, излегенден эсе теджелген товар кёб болгъаны.
Башха затланы алыб къарасакъ, да болум сейирсинирчады: алтотур (март) айда тюкенле телевизорланы учуз сатыуну тохтатхандыла. Ала бла бирге компьютерлени багъалары да ёсгенди. Аланы керекли затлары дуния дараджада да табылыб бармай болады алай.
Эресейни Банкыны КъЧР-де бёлюмюню тамадасы Дмитрий Мещеряков: «Джумушлагъа эс бёлсек, пансионатлада солуу учузуракъ болгъанды. Солуу кёзюу башланнгынчы ала адамланы кеслерине кёллендирир мурат бла аз хакъ аладыла бусагъатда», – дейди.
Ол чертгенден, саулукъ сакълау санагъатда башха джумушла, айырыб тиш багъыу эмда салыу, бир да багъа болгъандыла. Стоматологла аны кереклени, медикаментлени багъалылыкълары бла байламлы этедиле.
Республикада инфляция 6,4 процент болгъанды. Къралда ол кёргюзюм 5,9 процентди.
Эресейни Банкы оюм этгенден, бардырылгъан ачха-кредит политикагъа кёре, быйыл инфляция 4,5–5,5 процентге, келир джыл да 4 процентге тюшерге керекди.