Къарачай-Черкес Республиканы Байрамукъланы Халимат атлы кърал миллет библиотекасыны уллу залында Афган къазауатны ветераны, подполковник чынны джюрютген, Къарачай-Черкесияда генерал-майор Боташланы Къанаматны аты бла къуралгъан абычарланы организациясыны президиумуну тамадасы, РФ-ны Джазыучуларыны союзуну члени, генерал-полковник Махаметланы Солтанны аты бла къуралгъан Афганистанда, СВО-да болгъан ветеранланы организациясыны тамадасы Мамчуланы Муссаны джашы Исса-Алийни «Времён связующая нить» деген ат бла чыкъгъан джангы поэзия китабыны презентациясы болду.

Джыйылгъанла аны чыгъармачылыкъ, джашау джолуну юсюнден сёлешдиле.
Алайгъа келгенлени арасында КъЧР-ни Миллет ишлерини, кёбчюлюк коммуникациялары бла басмасыны хакъындан министрини кенгешчиси, тарих илмуланы кандидаты, Эресейни Джазыучуларыны союзуну члени Хатууланы Рашид, «Къарачай – алан халкъ» джамагъат бирлешликни келечилери, кърал газетлени баш редакторлары, башха къонакъла бар эдиле.
Алайда «Пять культур – одна республика», «Времён связующая нить», «Картины известных художников Карачаево-Черкесии» деген атлары бла юч аламат кёрмюч къуралгъан эди.
Джыйылыуну библиотеканы директоруну орунбасары Хубийланы Эльвира ачды. Ол джыйылгъанлагъа хошкелди айтыб, библиотека хар заманда да республиканы халкъларыны тарихлерини, адабиятларыны, маданиятларыны, санатларыны, илмуну аралыгъы болуб, бу джаны бла джыл сайын да мийик дараджалы ишле бардырыб тургъанын чертиб сёлешди. Мамчуланы Исса-Алийни джашау джолуну, чыгъармачылыкъ ишини хакъындан сёлешди. Аны айтханы бла биргелей электрон презентация да бардырылды. Ол, республиканы халкъларыны арасында къарнаш шохлукъну, бирикмекликни кючюн бегите, ёсюб келген джаш тёлюню керти адамла болуб ёсерлерине, аланы патриотлукъгъа юретиуде да энчи къыйын салгъанын айтды.
Ызы бла талай адам сёлешди. Ала, Исса-Алийни аскер джетишимлерини, Афганистаннга табдырылгъан болушлукъгъа къошхан энчи юлюшюню эмда республикабызда джамагъат ишле бла байламлы бардыргъан уллу джумушларыны хакъындан айтдыла. Талай афганчы, Ата джуртну аллында кеслерини аскер борчларын толтура, бир-бирин джакълай, сакълай, джигитлеча ёлгендиле деб, аланы эсгериуню джаш тёлюню ариу халиге, патриотлукъгъа юретиуде уллу магъанасы болгъанын билдирдиле. Исса-Алий, не тукъум болумда да таб оноу этиб, таукеллигин, тирилигин кёргюзгенин, джаш аскерчилеге, къалгъанлагъа болуша, джанын-къанын аямай кюрешиб, алагъа салыннган аскер борчну махтау бла толтургъанлай тургъанын хапарладыла.
Ала, джыйым китабны юсюнден сёлеше, аны назмулары таб джазылгъанларыны, аланы терен магъаналары болгъанларыны, авторну тин-иннет байлыгъыны, адамлыгъыны, ишленмеклигини, джигитлигини, не джаны бла да адамлагъа хайыр келтирген кючюню дараджасыны мийиклигин ачыкъладыла.
Джыйылыуну аягъында Исса-Алий, аны китабыны презентациясына келгенлеге бюсюреу этиб, разылыгъын билдирди, китабларын саугъа этди.

Узеирланы Хусей.