Къарачай-Черкесия «Биз тазалыкъ ючюнбюз» деген бютеу Эресей мамматлыкъны ыйыгъына къошулгъанды. Республикан мамматлыкъгъа бютеу шахарла бла районланы келечилери чыкъгъандыла. Анга волонтёрла, кърал эмда муниципал къуллукъчула, предприятиелени, организацияланы адамлары, студентле, эллени джамагъаты да тири къошулгъандыла.

Айтыргъа, мамматлыкъгъа 33 мингнге джууукъ адам чыкъгъанды.
КъЧР-ни Башчысы Темрезланы Рашид ол кюн кёб тюрлю иш баджарылгъанын МАКС-да кесини каналында чертгенди.
– Ол кюн 200 кюрюч терек орнатылгъанды. Арттотур (апрель) айны аягъына 10 мингден аслам терек салынныкъды. «Эсгериуню терек бачхасы» Ата джуртну къоруулай джан бергенлени сыйларына аталгъанды, – деб джазгъанды Темрез улу.
Ол кюн огъуна «Эресейни сууу» деген акцияны тамалында суу джагъаланы ариуларгъа да кёб адам къошулгъанды. Эсгертмелени, мемориалланы джарашдырыугъа уллу магъана берилгенин да чертерге тыйыншлыды. Айтыргъа, ол кюн бютеулей да 410 гектар джерде багушдан къутулгъандыла.
– Мамматлыкъгъа юлюш къошханлагъа разылыгъымы билдиреме. Быллай ишле адамланы бирикдиредиле, джашагъан джерибизге джан аурутургъа кереклисин эсгертедиле, хар неге да ие кёзден къараргъа юретедиле, джаш тёлюню тюз джол бла барыргъа учундурадыла, – деб джазгъанды регионну Башчысы.