2027-чи джылны аягъына дери Гитче Зеленчук сууну юсю бла баргъан, узунлугъу 135 метр болгъан кёпюрге тамамлы ремонт этилликди. Ол Адыге-Хабль районда орналгъанды.

Алгъын кёпюр эки сызгъылы болгъанды. Энди джюрюрге тынч да, таб да болур ючюн, аны тёрт сызгъылы этер мурат барды.
– Бюгюнлюкде «Кавказ» джол управлениени къуллукъчулары, кёпюрню чачыб, улоу башха джертин ётерча болум къурагъандыла.
Кёпюрню ишлеб башлагъанларын да айтыргъа тыйыншлыды. Заманны излемине келишген деменгили материалладан ишленникди кёпюр. Айтыргъа, аны кенглиги 25 метр, хар тёрт сызлыгъыныкъы да 3,5 метр боллукъдула, – деб билдиргендиле «Кавказ» джол управлениени ФКУ-ну пресс-къуллугъунда.
Планда белгиленнгенине кёре, кёпюрню юсюне бузлатмаучу комплекс тёшелликди. Метеостанцияла джол бузларгъа боллугъун билдирселе, автомат халда кёпюрню юсюне аны бузлатмай турурча суусун реагент къуярыкъдыла. Ол зат алайда улоугъа къоркъуусуз джюрюрге мадар берликди. Джаяу джюрюрча джолчукъла да джарашдырыллыкъдыла. Аланы юслерине асфальт-бетон тёшелликди, эки джанларына буруучукъла этилликдиле.