Джыл сайын арттотур (апрель) айны ахыр ыйых кюнюнде Къазакъланы реабилитацияларыны кюню белгиленеди. Быйыл ол кюнню энчи магъанасы барды – «О реабилитации репрессированных народов» деген закон алыннганлы 35 джыл толгъанды. Алай бла, тарих тюзлюк орун алыб, къазакъланы джангырыулары башланнганды.

Къазакъланы реабилитацияларыны кюнюне аталгъан къууанч джыйылыу Преградна стансени ара майданында ётгенди.
Джыйылыуну аллы бла Къыбыла Къарачай-Черкес клиса округну благочинныйи, Зеленчук станседе клисаны башчысы иерей Александр Якушев, репрессияланы джылларында ёлген къазакъланы эсгере, христиан динде джюрюген адет бла дууа этгенди.
Ызы бла джыйылгъанланы алларында КъЧР-ни Правительствосуну Председателини орунбасары Михаил Гаджиев, КъЧР-ни Башчысыны Къазакъланы ишлерини хакъындан управлениесини тамадасы Игорь Шаганов, Уруп районну раис-имамы Ёзденланы Резуан, КъЧР-ни Халкъ Джыйылыууну (Парламентини) депутатлары, СВО-ну ветеранлары, кърал эмда муниципал власть органланы къуллукъчулары дагъыда башхала сёлешгендиле. Ала бары да бюгюнлюкде Къобан къазакъчылыкъ Ата джуртубузгъа халал къуллукъ этерге хазырлыкъ танытхан керти кюч
болгъанын чертгендиле.
Къарачай-Черкесия тюрлю-тюрлю миллетлени, динлени келечилери бир-бирлери бла шохлукъда джашагъанлары, къыйынлыкъны, къууанчны да бирге юлешгенлери, тин байлыкъларын сакълагъанлары бла ашхы юлгюдю. Быллай эсгериу кюнле тарихни сакъларгъа, ата-бабалагъа сый берирге кереклисин республикада джашагъанланы эслерине салады.
Джыйылыуну кёзюуюнде КъЧР-де къазакъ бирлешликлени атаманлары бла Преградна станседен бёлек адам Бюсюреу къагъытла бла саугъаланнгандыла. «За возрождение казачества» деген белги Уруп районну къазакъларына берилгенди. Аны бла бирге Баталпашинск къазакъ бирлешликни атаманы, Уруп районну администрациясыны башчысы, Уруп районну къазакъ бирлешлигини атаманы да талай адамны саугъалагъандыла.
Къонакълагъа Преградна стансени ара майданында уллу концерт да кёргюзюлгенди.
Джыйылыуну ахырында къазакълагъа аталгъан эсгертмеге гокка хансла салгъандыла.