Бу кюнледе Черкесск шахарда Кеси башларына оноулу джергили органланы кюнюне аталгъан уллу къууанч джыйылыу болгъанды.

Анга къошулгъанлагъа хошкелди айта, республиканы ара шахарыны мэри Алексей Баскаев: «Бу байрам кюн джашауларын Черкесскени ёсюмюне атагъан иш нёгерлерибизге разылыгъыбызны энтда бир кере билдиребиз.
«Малая родина – сила России» деген муниципал форумда РФ-ны Президенти Владимир Путин кеси башларына оноулу джергили органла, адамла бла къысха байламлылыкъ джюрюте, къралгъа уллу магъанасы болгъан ишни этгенлерин чертгенди. Керти да, джергили органланы баш борчлары адамланы джарсыуларына эс бёлюудю. Ол борчларын мийик дараджада толтургъанлагъа айырыб сый беребиз», – дегенди.
Алайда КъЧР-ни Правительствосуну Председателини биринчи орунбасары Смаккуланы Дагир, КъЧР-ни Халкъ Джыйылыууну депутаты Алексей Ганшин дагъыда башхала махтаулу къуллукъ этген 30 адамны Къарачай-Черкес Республиканы Башчысыны Хурмет грамоталары, Правительство бла Парламентни Разылыкъ къагъытлары бла саугъалагъандыла.
Къууанч джыйылыуда кеси башларына оноулу джергили органланы халкъла арасында келечилигин баджаргъан бирлешликден (ВАРМСУ), Черкесскени мэриясы бла Думасындан саугъала алгъанла да болгъандыла.