Къарачай-Черкесияны Башчысы Темрезланы Рашид «Диктант Победы» деген патриот акциягъа къошулгъанды.

Адетдеча, быйыл да Уллу Хорламны байрамы джууукълашыргъа «Диктант Победы» деген халкъла арасы патриот акция бардырылды. «Бирикген Эресей» политика партияны башламчылыгъы бла къуралгъан акцияны тамалында 7 мингнге джууукъ джердешибиз, быйыл 8-чи кере диктант джазыб, Ата джурт къазауатдан къалай хапарлы болгъанларын ачыкъладыла.
Аны юсюнден КъЧР-ни Башчысы Темрезланы Рашид: «Бу диктант къазауатны къанлы джолларын, белгили аскер башчыланы энчи хапарларын, Уллу Хорламгъа джууукълашдыргъан башха магъаналы ишлени юслеринденди. Анда хар соруу джигитликни, Хорламны сыйын эмда Ата джуртлары ючюн джанларын аямагъан джигитлени эсгертеди. Анда бусагъатда бардырыла тургъан аскер къаугъаны юсюнден соруула да теджеледиле. Бу иш Ата джуртну къоруулаугъа бютеу тёлюле да бирча магъана бергенлерин, аны кеслерине сыйлы борчха санагъанларын кёргюзеди», – дегенди.
Кёбчюлюк диктантны арттотур (апрель) айны 24-де джазгъанды. Республиканы Башчысы Темрезланы Рашид бу патриот акциягъа уллула бла тенгликге сабийле да къошулсала излегенин чертгенди. Уллу Хорламны кюнюне аталгъан сынау иш диктантпобеды.рф. сайтда теджелгенди.