Бизни миллетибизде палауну сюймеген хазна киши болмаз. Татыулу палауну уа тамам устала иги этедиле дегенлеге да кёб тюбейбиз, алай болса да, аны къайсы бирибиз да усталадан кем этерик тюлюбюз деген оюмда, палауну бир тюрлюсюн къалай хазырларгъа кереклисини юсюнден окъуучуларыбызгъа теджерге излейбиз.
Палауну тууар, къой, тауукъ дагъыда ала кибик бирси халал этден хазырларгъа боллукъду. Бюгюн а тууар этден хазырларыкъбыз аны. Алайды да, бир орта юйдегиге (5-6 башлы) джетерча, этерни аллы бла анга къошуллукъ затланы хазырларгъа керекди: 400-500 грамм этни, 1 килограмм принчни, 1 килограмм быхыны, бир соханны, 150 грамм чёблеу джауну, 1 терен къашыкъ тузну, 1 шай къашыкъ пурчну, бир джарты къызыл шибижини (ёсген шибижиледен), 50-70 грамм сарысмакъ (7-8 тишли бир тюб), 50 грамм джюзюм къатханны (кишмиш) неда 100 грамм шаптал къатханны.
Чоюннга чёблеу джауну къуюб, отха асаса. Джау бек къызгъанлай, соханны ууакъ туураб атаса. Ол, къызылсыман бет алыб къууурулургъа (кюйдюрмей), джууулгъан этни ууакъ туураб, анга джибересе да, къалакъ бла къатышдыра, къызыу отда 10 минут чакълы бирни тутхандан сора, башындан пурчну себесе, къызыл шибижини да бек ууакъ туураб атаса да, чоюнну башын джабыб, отну сериуюн этиб, алай бла 30-40 минутну биширесе. Эт кесинден чыкъгъан сууунда тамам бишерге керекди. Алай болур ючюн, хаман кёз джетдире, бек къууурмай неда кюйдюрмей, булгъай турургъа керекди. Чоюнда эт бише тургъан кёзюуде принчни ариулаб, терен табакъда юсюне къолунг чыдаялмазча исси сууну къуюб, агъач къалакъ бла къатышдыра, ол халда эки кере джуууб, ючюнчю кере уа исси сууда джибитиб къояргъа керекди.
Заманы джетиб, эт тамам бишди деген сагъатда, ариуланнган быхыланы тюз тёртмюйюш, не бек джукъа неда бек къалын этмей орта халлы ууакъ туураб, чоюннга къуяса да дагъыда сериуюн отда 30-40 минут чакълы бирни къатышдырмай биширесе. Андан сора быхы бишкекленди деген сагъатда, исси сууда джибиб тургъан принчни сюзюб чыгъарыб, анга къуюб къалакъ бла тёппесин тюз этиб, башындан тузну кереклисича бир атыб, 500-600 грамм исси сууну чоюнну къыйыры бла саркъыта, къуяса. Сёзден, къараб эсеблерге тынч болурча – къуюлгъан суу принчни башын аз-буз джабаргъа керекди. Ол халда, чоюнну башын джабыб, сериуюн отда дагъыда 1 сагъат чакълы бир заманны биширесе. Заман джетди деген сагъатда башындан сарысмакъны чоюнну ортасына принчге терен батдырыб, джууулгъан джюзюм къатханланы да къошуб башын джабыб, чоюнну тюбюн джукълатыб быстырла бла къаты чырмаб, 10-15 минутха тынчайыр-
гъа къояса. Андан сора, чоюнну башын тюбюне айландырыб, чара табакъгъа къотарыб, эки къалакъ бла неда эки сюзгюч бла къатышдыраса. Андан сора табакълагъа палауну салыб, тепсинги джасаргъа заман джетди. Тепсигизге гоппан бла айранны салыргъа унутмагъыз. Аш татлы болсун!
Рубриканы БАТЧАЛАНЫ Фатима бардырады.
