Республикан аралыкъда джашагъан 32 джыл болгъан тиширыу, Эресейни МВД-ны Черкесск шахарда бёлюмюне барыб, кесин хыйлачылагъа алдатханыны юсюнден билдиргенди.

Тиширыу айтханнга кёре, 2026-чы джыл байрым (февраль) айны ал сюреминде белгили сайтланы биринде машина сатылгъаныны юсюнден билдириу кёргенди. Ол «сатыучу» бла байламлылыкъгъа чыкъгъанында, аны телефонуна машинала бла кюрешген компанияны мессенджерде къауумуну ссылкасын ийгендиле.
Ызы бла тиширыу, ол къауумгъа къошулуб, машинала «сатханнга» джазгъанды. Анга айтханларына кёре, таможня тёлеуле бла бирге машинаны багъасы 1 690 000 сом чыгъады, ачханы бир кесегин да машина келтирилгенден сора тёлерге да болады.
Байрым айны 12-де тиширыу, Черкесскеде банкланы бирине барыб, 720 минг сом ашыргъанды. Андан сора компанияны «экспедитору» аны бла байламлылыкъгъа чыгъыб: «Машинаны багъасын тергеген кёзюуде халатла джиберилгендиле. Алай бла, сиз энтда ачха ашырыргъа керексиз», – дегенди. Экинчи кюн тиширыу энтда 855 500 сом ийгенди.
Тиширыу бла «сатыучуну» келишиулерине кёре, машина 10 кюнню ичинде келтирилирге керек эди. Алай а «сатыучула» байламлылыкъгъа чыкъгъанны къойгъандыла, сёзлерине да толу болмагъандыла. Бютеулей да ол тиширыу 1 605 500 сомундан къуру къалгъанды…
Багъалы джамагъат! КъЧР-ни МВД-ны къуллукъчулары ачханы алдан излеген, ышаннгысыз интернет-ресурслада сатыу-алыу этмегиз деб эсгертеди. Танымагъан адамларыгъызгъа ачхагъызны ашырыргъа ашыкъмагъыз. Социал сетледе сатыу-алыу этмегиз, анда теджелген джумушла бла хайырланмагъыз.

КъЧР-ни МВД-ны пресс-къуллугъу.