Арттотур (апрель) айны 17-де Къарачай-Черкесия «Библионочь» деген бютеу Эресейде бардырылыучу ишге 15-чи кере къошулгъанды. Быйыл ол «Единство народов – сила России» деген чакъырыу бла ётгенди.

«Библионочь – 2026» библиотекала къуру китабланы сакъларгъа джораланыб къалмай, алагъа джюрюгенле энчи ёсюм алгъанларын, хар неден да терен хапарлы болгъанларын джамагъатха эсгертир мурат бла къуралгъанды.
Аны тамалында Сергей Никулин атлы Къарачай-Черкес республикан сабий библиотекада да, «Библиосумерки – 2026» деб, гитче окъуучучукълагъа джораланнган иш бардырылгъанды.
Сабийле шохлукъну джырларын джырлагъандыла, кавказ миллетлени тепсеулерине усталыкъларын кёргюзгендиле, «О своём крае мы все знаем» деген акъыл оюннга къошулуб, билимлерин да сынагъандыла. Ала «Сказки и легенды народов России: роспись по дереву, ПВХ, коллаж», «Мы песчинки одной страны» деген мастер-класслагъа къараб, тюрлю-тюрлю материаллада джазаргъа, оюула чыгъарыргъа, къумда суратла салыргъа юреннгендиле. Сабийле кеслерини къол ызлары бла «Шохлукъну терегин» да джасагъандыла.
Библиотеканы окъуучуларына къонакъгъа «МонЭльбрус» театрны директору, продюсери Къоркъмазланы Руслан да баргъанды. Ол иги эшитмеген сабийлеге джораланнган проектлени юслеринден хапар айтханды. Алагъа къарачай тилде чыкъгъан «Киштик» атлы журналла бергенди.
Сабийлени окъуугъа кёллендириуге аталгъан ишни кёзюуюнде «Память народа в книжной культуре» деген китаб кёрмюч да къуралгъанды. Бютеулей да окъуучуланы ашхы ингирлерине 300-ге джууукъ адам къошулгъанды.
«Традиции живы, пока мы их помним, создаём и передаём дальше» деген чакъырыу бла аллай иш Байрамукъланы Халиматны атын джюрютген республикан библиотекада да бардырылгъанды.
Къысхасыча айтсакъ, «Библионочь – 2026» деген акция Къарачай-Черкесияда бек джарыкъ ётгенди. Анга къошулгъан сабийле, уллула да эм азында эсге алыр, файдасы болур бирер затха юреннгендиле.

БАЙРАМКЪУЛЛАНЫ Зульфия.