Мындан алда Эресейни МВД-сыны къуллукъчулары, Черкесскеде профилактика ишле бардырыргъа деб, эсебге алыннган джаш адамла бла, аланы аталары-аналары бла тюбешгендиле. Ол тюбешиуге полициячыла, динчиле, спортчула дагъыда башхала къошулгъандыла.

Бу ишни баш мураты акъыл-балыкъ болмагъанланы Эресей Федерацияны законларын тутаргъа, джорукъгъа сыйыныб джашаргъа иги окъургъа кереклисин ангылатыу эмда джашауда этген ишлерине джууаблылыкъны сездириу болгъанды. Дин къуллукъчула джашла бла къызлагъа, ала ашхы адамла болуб ёсер ючюн, динни излемини юсюнден сёлешгендиле. Джууукъ адамын сюерге, башхалагъа да джумушакъ болургъа, игилик этерге, шохлукъ тутуб джашаргъа кереклисини хакъындан айтхандыла.
Ачыкъ ушакъда джаш адамлагъа спорт секциялагъа барыргъа, библиотекалагъа джюрюрге, джаш тёлю аралыкълада солурча мадарла къураргъа, онлайн курсланы ётерге боллукъларын билдиргендиле.
Тюбешиуню къурагъанла чертгенден, быллай профилактика ишле джаш тёлюню арасында аманлыкъ ишлени азайтыргъа джарайдыла. Джаш адамла бла юйдегилени, полицияны, джамагъат институтланы араларында ангыламакълыкъны, бирикмекликни, шохлукъну кючюн бегитирге джараулу мадарла къурайдыла.