«Эресейни иши. Мадарланы заманы» деб иш къоллу болуу бла байламлы бютеу Эресей джармалыкъгъа Къарачай-Черкесия да къошулгъанды. Республиканы джер-джеринде бардырылады бу иш.

Черкесскени Маданият къаласында уа джармалыкъны эм уллусу ётеди.
Мероприятие адамланы иш бла баджарыугъа, джаш тёлюню усталыкъла бла шагъырей этиуге, иш орунлары болгъанлагъа кадрла сайлаугъа джораланнганды.
– Иш къоллу болуу бла байламлы джармалыкъны быйыл тёртюнчю кере бардырабыз. Былайда адамла бетден бетге тюбешиб сёлешедиле. Иш бла баджарлыкъла алагъа къайсы устала джетишмегенини юсюнден хапар айтадыла. Студентле эмда баш билимли джаш адамла сорууларына тынгылы джууаб аладыла, заманны излемине келишген усталыкъла къайсыла болгъанларын биледиле. Айтыргъа, иш бла байламлы кёб джангы затны эшитирге мадар табадыла, – деб хапар айтханды КъЧР-ни Правительствосуну Председателини орунбасары Джанибек Суюнов.
Урунуу джармалыкъгъа 300-ге джууукъ организация къошулгъанды. Ала иш къоллу болургъа излегенлеге 300-ден аслам иш орунну теджегендиле.
Джаш адамла, предприятиелени келечилери бла тюбешиб, хапар сорургъа ол-бу иш алагъа келишгени бла къалгъанын билирге мадар табарыкъдыла.
Былайда консультацияла алырча мадар болгъанын, мастер-классла эмда тренингле бардырылгъанларын, ол затла сайлау этерге болушханларын да чертерге тыйыншлыды.
Джармалыкъгъа «Ата джурт къоруулаучула» деген бютеу Эресей фондну джергили бёлюмю да къошулгъанды. Ала аскер къаугъада болуб къайтханлагъа эмда аланы юйдегилерине къаллай таблыкъла бла хайырланыргъа тыйыншлысындан хапар айтадыла. «Доммай» аскер бёлек бла къалай кесамат этерге боллугъун ангылатадыла.
Джармалыкъ ишин таб къурагъанды. Иш бла баджарылыргъа излегенле былайгъа джол салыргъа боллукъдула.

(Бизни корр.).