Арттотур (апрель) айны 6-дан 26-на дери Эресейни регионларында «Как кодить на квантах» деген цифра дерсле бардырылгъандыла.

Квант технологиялагъа аталгъан дерслени «Росатом» деген кърал корпорация бла «Цифровая экономика» АНО къурагъандыла. Алагъа РФ-ны Билим бериу министерствосу, РФ-ны Цифра ёсюмюню министерствосу болушлукъ этедиле.
Дерследе сохталагъа квант технологияланы программированиеде хайырландырыуну, аны файдалылыгъыны, программала къурауну юсюнден хапар айтылгъанды. Аллай дерсле къралны регионларында арттотур айны 26-на дери бардырылгъандыла. Аны бла бирге арттотур айны 14-де Квант технологияланы халкъла арасы кюню белгиленнгенди. Ол кюн ВДНХ-да «Атом» деген музейде москвачы сохталагъа цифра дерс къуралгъан эди, анга Эресейни регионларында школларыны сохталары онлайн халда къошулгъан эдиле.
Регионлада цифра дерслени кёзюуюнде квант программированиени юсюнден фильм кёргюзюлгенди. Аны джигитлери, «МИСИС» деген технология университетге барыб, квант компьютер къалай ишлегени бла шагъырей болгъандыла. Фильмде алимле квант программаланы, ала баджаргъан джумушланы юслеринден хапар айтадыла.
«Росатом» кърал корпорация цифра дерсле бардырыугъа квант технологияла бла байламлы эресейчи «джол картагъа» джууаблы болгъаны ючюн къошулгъанды. Квант санагъатха кадрла къурар мурат бла сохталаны, студентлени арасында квант технологияланы белгили этиу «джол картаны» 2030-чу джылгъа дери баш борчларыны бириди.
Цифра дерслени «Экономика данных и цифровая трансформация государства» деген миллет проектни «Кадры для цифровой трансформации» деген федерал проектин толтурууну эмда «Технологическое лидерство» деген миллет нюзюрге джетиуню тамалында къурагъандыла.

БИЧЕНЧИЛАНЫ У.