Арттотур (апрель) айны 22-де саулай къралыбызда, Уллу Хорламны кюнюне аталыб, «Георгиевская лента» деген халкъла арасы акция башланнганды.

Аны «Бирикген Эресей» партия бла Хорламны волонтёрлары къураб бардырадыла. Акцияны баш мураты – Уллу Ата джурт къазауатны джигитлерини атлары унутулмазча этиу, Эресейни аскер махтаууну белгисине сый бериу.
Акциягъа Къарачай-Черкесия да тири къошулгъанды. Арттотур айны 23-де «Бирикген Эресей» партияны регионал бёлюмюню Джаш гвардиясыны келечилери КъЧР-ни Правительствосуну Юйюню эмда Черкесск шахарны мэриясыны аллында Георгий лентала бла аны тарихини юсюнден информацион къагъытла чачхандыла.
«Бирикген Эресей» партияны КъЧР-де бёлюмюню Джаш гвардиясыны тамадасыны борчларын толтургъан Баиланы Керам «Георгиевская лента» акцияны магъанасыны юсюнден: «Бу акция джыл сайын Уллу Хорламны кюнюню аллы бла бардырылады. Ол адамлагъа Уллу Ата джурт къазауатны тарихин эсгертеди, къарт аталарыбызны джигитликлерине сый берирге юретеди. Быллай ишлени магъанасы уллуду, артыкъсыз да ёсюб келген джаш тёлюге. «Бирикген Эресей» патияны Джаш гвардиясыны келечилери Георгий лентала чачыугъа тири къошуладыла», – деди.
Акция хычаман (май) айны 9-на дери барлыкъды.

САЛПАГЪАРЛАНЫ Умар.