Эресейни Тиширыуларыны союзуну Къарачай-Черкесияда регионал бёлюмюню келечилери «Черкес хэку», «Ногъай давысы» газетлени баш редакторлары Люсана Абидокова бла Алтынай Атуова эмда «Радуга» деген сабий журналны баш редактору Мадина Асланукова «И только в единстве сила России» деген ат бла Къалмукъ Республикада бардырылгъан тиширыуланы регионла арасы форумуну ишине къошулгъандыла.
Къалмукъ Республиканы Правительствосуну Председателини орунбасары, социал ёсюм бла урунуу министри Марина Петровна, джылы алгъышлаб, джыйылгъанлагъа игилик теджегенди. Андан сора Эресейни Тиширыуларыны союзуну Къарачай-Черкесияда регионал бёлюмюню тамадасы Борлакъланы Маринаны республиканы юсюнден этген видео-презентациясы кёргюзюлгенинде, джыйылгъанла, аны бек джаратханларын харс ургъанлары бла танытхандыла.
«Багъалы тенгле, форумну ишине къошулгъанла, чакъырылгъан къонакъла, сыйлы Киштян Ивановна! Мен Къарачай-Черкес регионал бёлюмню эмда кесими атымдан сизни «И только в единстве наша сила!» деген регионла арасы форумну ишине къошулгъаныгъыз бла джылы алгъышлайма. Тиширыуланы фахмулары, билимлери, акъыллары, тириликлери, къурау кючлери бизни халкъланы арасында шохлукъну, ангыламакълыкъны, бирикмекликни кючюн бегитгени хакъды. Сизни бу этген ашхы ишигиз, игиликге, кертиликге, ашхылыкъгъа къуллукъ этеди. Биз анга уллу багъа беребиз. Бизни халкъланы бирикдирген кёб зат барды, аланы арасында юйдегиге къайгъырыу, ашхы адетлени сакълау, аначылыкъ бла сабийликни джакълау, Ата джуртха кертилик тутуу, аны джашнаб турурун кёрюрге тырмашыу дегенча ашхы затла энчи орун аладыла. Бу ашхы форум шохлукъну, бирикмекликни площадкасы боллугъуна мен толу ышанама. Киштян Ивановна, сизге, форумну ишине къошулгъанланы барына да кючлю саулукъ, рахатлыкъ, мамырлыкъ теджейме», – дегенди ол. Аны ызындан талай адам сёлешиб, бирикмекликни, шохлукъну, башха ашхы затланы юслеринден айтхандыла.
Форумну кёзюуюнде Къалмукъ Республиканы белгили артистлери концерт кёргюзгендиле. Джыйылыуну аягъында Къалмукъ Республиканы Тиширыуларыны союзуну регионал бёлюмюню тамадасы ары баргъанлагъа разылыгъын билдириб, саугъала форумгъа къошулгъанларына сертификатларын бергенди.
Абидокова Люсана,
Къарачай-Черкесия бла Адыгея республикаланы махтаулу журналисти.
