Мындан алда Черкесскеде Къарачай-Черкес Республиканы Джамагъат палатасыны «Доклад об итогах деятельности Общественной палаты Карачаево-Черкесской Республики за период с мая 2025 года по май 2026 года» деген темагъа аталгъан пленар кенгеши болду. Анда 2005-чи джыл хычаман (май) айдан бусагъатха дери этилген ишле сюзюлдюле.
Алайгъа келгенлени арасында КъЧР-ни Башчысыны Администрациясы бла Правительствосуну тамадасыны биринчи орунбасары Хубийланы Марат, Къарачай-Черкесияны Профсоюз бирлешлигини союзуну тамадасы Айбазланы Раиса, «МАКС» ЗАО-ну Черкесскедеги филиалыны директору, Джамагъат палатаны тамадасыны орунбасары Гочияланы Борис, Джамагъат палатаны къурамында болгъанла бар эдиле.
Биринчи сёз Хубийланы Маратха берилди.
«Джамагъат палатаны къурамында болгъанла тутхан ишлерин тыйыншлы дараджада толтурадыла, ала не тюрлю ишни юсюнде да власть бла джамагъатны арасында байламлылыкъны тутадыла. Предприятиелени, организацияланы, учреждениелени коллективлери бла ишлейдиле. Алагъа салыннган джууаблы борчну тыйыншлысыча толтура, кёб тюрлю миллет, федерал проектлени, башха ашхы башламчылыкъланы джашаугъа киргизирча мадарла къурайдыла. Кёб иш этилсе да, этиллик энтда барды. Джамагъат палатаны къурамында къайгъырыулу адамла мындан ары да ишлерин аны бла байламлы къурарла, деб ышанама», – деди Хубийланы Марат.
Кенгешге къошулгъанла Джамагъат палатаны къурамында болгъан бир адамны, анга салыннган борчладан башына бош этиб, аны орнуна башханы айырдыла.
Андан сора Елена Ляшова отчёт доклад этди.
«Бусагъат заманда Джамагъат палатаны баш иши адамланы сагъышларын, оюмларын властха билдиргенден сора да, ала башчылыкъ этген институтха ышанырча болум къурауду. Джамагъат бла властны араларында бирикмекликни кючюн бегитирге терен эс бёлюнсе, адамлагъа иги болгъанлай турлукъду, джамагъатны джашаууна таб боллукъду. Адамла властха ышансала, къралны ёсюмюне энчи юлюш къоша, не тюрлю ишни этерге да тири къошуллукъдула.
Отчёт этилген кёзюуде кёб иш баджарылгъанды. Сёз ючюн, школлада сабийле бла, институтлада студентле бла тюбешиуле бардырыладыла, джамагъат ёчлеге тюрлю-тюрлю конкурсла къураладыла, республиканы джеринде миллет проектлени джашаугъа киргизиу контролда тутулады. «Тёгерек столла» терен магъанасы болгъан башха ишле бардырыладыла. Экспертле федерал программала бла ишлейдиле. Бизни баш джетишимибиз Эресей Федерацияны Джамагъат палаталарыны арасында 10 игини тизимине киргенибизди. Ишибизни ол дараджада бардырыб турургъа керекбиз», – деди Елена Ляшова. Ол дагъы-
да адамлагъа хайыр келтирирге аталыб бардырылгъан талай ишни юсюнден хапар айтды. Аны ызындан Джамагъат палатаны къурамында болгъан талай адам сёлешиб, белгиленнген кёзюуде, адамланы бирикдириуге, социалэкономиканы айнытыугъа, рахатлыкъны, мамырлыкъны, республикабызгъа, къралыбызгъа хайыр келтирликге саналыб этилген ашхы ишлени юслеринден айтдыла. Аланы арасында, адамлагъа джарагъан, республикада джашаугъа киргизилген проектле, башха магъаналы ишле бар эдиле.
Лепшокъланы Хусеин.
