Эресейде «Джашау-турмуш таблыкъла» деген миллет проектни тамалында шахарлада, элледе объектлени джарашдырыу башланнганды. Адамла джерлени джарашдырыу бла байламлы кёзюулю чёб атыб тебрегендиле. Аны юсюнден Эресейни Президенти Владимир Путин «Малая родина – сила России» деген бютеу Эресей муниципал форумда айтханды.

Бу ишге КъЧР-де джол берилгенин регионну Башчысы Темрез улу да билдиргенди.
Быйыл республиканы 11 шахары бла элинде 18 объект ючюн джамагъат чёб атарыкъды. Айтыргъа, Черкесскеде, Къарачай шахарда, Тебердиде, Джёгетей Аягъында, Инжич-Чукунда, Эркин-Шахарда эмда Медногорскеде джашагъанла кеслери джаратхан объектлери ючюн чёб атарыкъдыла.
Преграднада, Кавказскеде, Хабезде эмда Зеленчукде джашагъанла джашаугъа сингдириллик дизайн-проектле ючюн чёб атарыкъдыла.
Озгъан джыл республиканы джамагъаты, чёб атыб, беш объектни сайлагъанларын билдиргенди. Кёб турмай аланы джарашдырыб тебрерикдиле.
2018-чи джылдан бери Къарачай-Черкесияда адамла сайлагъан 170 джер джангыртылгъанды.
– Багъалы джердешлерибиз! Барыгъызны да бу ишге тири къошулургъа чакъырама. 14 джылдан атлагъанла чёб атаргъа боллукъдула, – дегенди Темрез улу.