Хабез районну Бесленей элинде аскер къаугъагъа къошулгъанлагъа кёзюулю гуманитар джюк ашыргъандыла.

Кёб заманны аман болмай турлукъ ашарыкъдан-ичерикден, консерваладан, чайдан, кофеден эмда къол-бет джууаргъа джораланнган затладан къуралгъанды ол. Аны бла бирге, алагъа керекли товарланы алырча ачха болушлукъ да этилгенди. Джыйылгъан затны барысын да районда «Родные сердца» деген башламчылыкъ къауумгъа табдыргъандыла. Алайдан гуманитар болушлукъ СВО-гъа джол тутханды.
– Бесленейчиле Ата джуртларын сакълагъанлагъа таза джюрекден болушургъа излегенлерин танытхандыла. Бу джумушха уллу, гитче да къошулгъанды – хар бири да къолундан келгенича болушлукъ этгенди, – деб хапар айтхандыла Хабез районну администрациясында.
Айхай да, СВО-гъа къошулгъанлагъа эмда аланы юйдегилерине болушлукъ этерге джораланнган, КъЧР-ни Башчысы Темрезланы Рашидни башламчылыгъы бла къуралгъан штабны юсю бла джыйышдырылгъанды бу кёзюулю гуманитар джюк.