Республиканы ара шахарында тереклени заранлы къамыжакъладан тазалау башланныкъды. Бу ишни Эресейни Эл мюлк аралыгъыны джергили бёлюмюню къуллукъчулары шахар коммунал мюлкню келечилери бла бирге къолгъа алыр муратлыдыла.

– Мингнге джууукъ терекни «джууундурлукъдула». 700 каштан терек бла 296 нарат терек тазаланныкъды аланы тынгыларын бузгъан заранлы затладан. Аны бла да къалмай, парклада, скверледе гыбыланы къурутуу барады. 30 гектардан аслам джер тазаланныкъды, – деб джазгъанды соцсетледе шахарны мэри Алексей Баскаев.
Черкесскеде элия (июль) айда амброзия бла кюреш башланныкъды. Планда белгиленнгенине кёре, 100 гектар джерни аман хансы къурутуллукъду. Мэрияда билдиргенлерине кёре, 2021-чи джылдан бери амброзия ёсген джер 20 процентге къысхартылгъанды.
Бу джумуш бла байламлы адамла тилек къагъытларын администрацияны социал сетлерини юсю бла шахарны фатар-коммунал мюлк управлениесине табдырыргъа боллукъдула.
Алгъаракъда Черкесскени Покровский паркында 200 катальпа терек орнатылгъанды. Бу ишге башламчылыкъ «Мамматлыкъ» экология джамагъат бирлешлик этгенди – айхай да, Халкъ фронт бла шахарны мэриясы да тыйыншлы юлюш къошхандыла. Аны кибик «Эсгериуню терек бачхасы» деген акцияны джашаугъа сингдире, Черкесскеде энтда 90 терек орнатыр мурат барды.