«Россети Шимал Кавказ» компанияны Къарачай-Черкес бёлюмюнде ишлегенледен къан бериучю къауум къуралгъанды. Айтыргъа, ала 31 адам боладыла.

Медицина къуллукъчула къан керекди деб билдиргенлей, ала барыб къан да, плазма да бередиле. Энергетикле 475 кере донорлукъ этгендиле, 335 литрге джууукъ къан эмда плазма бергендиле.
Аланы арасындан джетеуленнге «Эресейни сыйлы донору» деген ат берилгенди. Эм кёб кере къан берген Александр Хабаровду – техника эксплуатация бла ремонт ишлени къуллугъуну тамадасы. Ол 74 кере къан бергенди, бютеулей да 33 лиртге джууукъ. Хабаровну юлгюсю бла баргъанла да аз тюлдюле – Александр Лепехин, Хыбыртланы Рустам, Байкъулланы Биазир да 50-ден аслам кере къан бергендиле.
Къарачай-Черкес республикан къан къуюучу станцияда билдиргенлерине кёре, энергетикле адамлагъа уллу болушлукъ этедиле. Ала берген къан кёб адамны джашаугъа къайтаргъанды, ол себебден, ала бюсюреуге-сыйгъа да тыйыншлыдыла.
Эресейде биринчи кере бир адамны къанын башхагъа 1832-чи джыл арттотур (апрель) айны 20-да Андрей Вольф къуйгъанды. Джыл сайын бизни къралда ол кюн Донорну кюню белгиленеди. Ол адамланы къутхаргъанланы байрамларыды.