Кеси башларына оноулу джергили органланы кюнюне джораланыб, Эресейни Президенти Владимир Путинни излеми бла, Москвада «МАЛАЯ РОДИНА — СИЛА РОССИИ» деген III-чю муниципал форум ётгенди.
Быйыл анга къралны 89 регионундан 7 мингден аслам къуллукъчу къошулгъанды. Форумгъа Къарачай-Черкесияны Башчысыны эмда Правительствосуну Администрациясыны тамадасы Мурат Озов къураб, республиканы шахар округлары бла муниципал районларыны башчылары да баргъадыла.
Джыйылгъанлагъа хошкелди айта, РФ-ны Президенти Владимир Путин: «Биз барыбыз да къралыбызны кеси башына эркинлигин сакълар, къоркъуусузлугъун бегитир ючюн кюрешгенибизни эсге алыгъыз. Джууаблы кърал къуллукъчула бары да бир къауумдула, муниципал органланы келечилери уа аны дагъаныдыла. Адамланы алларында властны сыйын чыгъарлыкъла сизсиз. Джамагъатны властха, тамблагъы кюннге ышанмакълыгъы сизни ишигизге кёре боллукъду», – дегенди.
Президент башчылыкъ этер болумлары болгъан адамланы кърал къуллукъгъа кёллендирирге кереклисини юсюнден да айтханды.
Владимир Путин СВО-ну ветеранларыны сынамларын магъаналы проектлени толтурууда хайырландырыргъа кереклисин да чертгенди.
Бизни республикада алай этилиб эртде башланнганды. КъЧР-ни Башчысы Темрезланы Рашидни излеми бла «Герои Карачаево-Черкесии» деген программа джетишимли толтурулады. Анга къошулгъан ветеранла, насихатчыла бла бирге кърал къуллукъда сынам алыб, бирер джерде ишлеб башлагъандыла.
«МАЛАЯ РОДИНА — СИЛА РОССИИ» форумну тамалында Эресейни Президенти муниципал къуллукъчуланы бир къаууму бла тюбешгенди. Ол тюбешиуге Черкесск шахарны мэри Алексей Баскаев къошулгъанды. Анда социал халда табигъат газ тартдырыу, Дагъыстанны суу къобхандан джарсыгъан муниципалитетлерине болушлукъ этиу, Эресейни чеклеринде орналгъан регионларына ёсюм алдырыу дегенча ишлени юслеринден сёлешиннгенди.
Республиканы Башчысы Темрезланы Рашид Черкесскени мэри алайда чертилгенни иш нёгерлерине айтыб, муниципалитетлени башчылары къуллукъларын анга кёре баджарлыкъларына ышаннганын билдиргенди.
Форумну кёзюуюнде РФ-ны Президентини Администрациясыны тамадасыны биринчи орунбасары Сергей Кириенко, РФ-ны Федерал Джыйылыууну Федерация Советини Председатели Валентина Матвиенко, «Бирикген Эресей» партияны тамадасы, РФ-ны Къоркъуусузлукъну хакъындан кенгешини тамадасыны орунбасары Дмитрий Медведев дагъыда башхала сёлешгендиле. Ала да хар кърал къуллукъчуну баш борчу джамагъатха къайгъырыу болгъанын, адамланы джарсыуларын кеси башларына оноулу джергили органлада ишлегенле кимден да иги билгенлерин, элледе джашау турмуш аланы башламчылыкъларына, джууаблылыкъларына кёре джараша баргъанын чертгендиле.
«Служение» деген муниципал ёчге тыйыншлы болгъанланы да алайда саугъалагъандыла.
