Арттотур (апрель) айны 22-де Къарачай-Черкесияны Башчысы Темрезланы Рашид Федерал налог къуллукъну бизни республикада управлениесини тамадасы Текеланы Расул бла тюбешгенди.

Тюбешиуде Федерал налог къуллукъну бизни республикада управлениеси озгъан джыл бла быйылны ал кварталында баджаргъан ишлени эсеблерин сюзгендиле.
Текеланы Расул Темрезланы Рашидге бюджетлени къайсы бирине да налог джыйыу тири бардырылгъаныны юсюнден джарашдырыб хапар айтханды.
Республиканы Башчысы Темрезланы Рашид Федерал налог къуллукъну тамадасы Даниил Егоровгъа, ол башчылыкъ этген ведомство бла Къарачай-Черкесияны иш джюрютюулерине уллу багъа бергени ючюн, разылыгъын билдиргенди. Темрез улу джергили налог органланы къуллукъчуларына да, ишлерин адамлагъа табыракъ къураб кюрешгенлери ючюн, бюсюреу этгенди.
Тюбешиуде этилген ушакъны юсюнден Темрезланы Рашид МАХ мессенджерде кесини каналында: «Регионал бюджетге тюшген хайыр асламыракъ бола баргъаны налог органланы тирирек ишлегенлери бла байламлыды. Аны себебинден, республиканы социал-экономика болумун айныта, РФ-ны Президенти Владимир Путин адамланы джашауларын игилендириу бла байламлы салгъан борчланы джетишимли толтурур хыйсабыбыз болады», – деб джазгъанды.