Арттотур (апрель) айны 23-де Къарачай-Черкесияны Башчысы Темрезланы Рашид РФ-ны Правительствосуну Президиумуну регионал ёсюмню хакъындан комиссиясыны кенгешине къошулгъанды. Кенгешни Эресей Федерацияны Правительствосуну Председателини орунбасары Марат Хуснуллин бардыргъанды.

Видеоконференция халда бардырылгъан кенгешде къралны регионларында «Инфраструктура для жизни» деген миллет проект бла «Строительство» деген кърал программа къалай толтурулгъанлары сюзюлгенди.
Къарачай-Черкесияны Башчысы Темрезланы Рашид бизни регионда кёбчюлюк хайырланыучу джерлени джарашдырыу, билим бериу, саулукъ сакълау, спорт, маданият объектлени джангыртыу ишле къызыу бардырылгъанларын чертгенди.
Кенгешде джашау-турмуш комплексни игилендириуню юсюнден да сёлешиннгенди. Регионла, тохтаусуз хайырландырылгъан сетле аман бола баргъанларына эс бёле, миллет проектлени, федерал программаланы кючлери бла аланы джангырта баргъанлары да айтылгъанды.
Аны юсюнден Темрезланы Рашид: «Ол джаны бла кёб иш этиледи. «Инфраструктура для жизни» деген миллет проект, бек кёб джумушубузну баджарыргъа джол ачыб, адамланы джашауларын игилендирирге джарайды», – дегенди.