Бу кюнледе Черкесск шахарда джашагъан 34 джыл болгъан биреулен кесин хыйлачылыгъа алдатханыны юсюнден полициягъа хапар билдиргенди.

Ол айтхандан, бир тиширыу, анга къонгурау къагъыб: «Мен домофонлагъа къарагъан организацияны къуллукъчусума. Сиз джашагъан юйде домофонну ауушдурлукъбуз. Юйюгюзге кирирча сиз СМС бла келген кодну айтыргъа керексиз», – дегенди. Эркиши, анга ийнаныб, кодну айтханды.
Бёлек замандан эркишини телефонуна «Госуслуги» порталда энчи кабинетине ким эсе да киргенини, микрокредит организацияла анга ёнгкюч (займ) берирге разы болгъанларыны юслеринден билдириуле келгендиле. Кесин хыйлачылагъа алдатханын ангылаб, ол Кёб фунциялы аралыкъгъа баргъанды, анда «Госуслуги» порталда энчи кабинетинден паролну ауушдургъанды, кредитле джарашдырыугъа да тыйгъыч салдыргъанды. Алай бла, хыйлачыла эркишини аты бла ёнгкюч ачха алалмагъандыла.
Къарачай-Черкесияны сыйлы джамагъаты! Сизге телефонугъузгъа келген кодну айтыгъыз дерге кишини иши джокъду. Ол сизни энчи информациягъызды. Кърал органланы, башха организацияланы къуллукъчулары адамлагъа къонгурау къакъмайдыла, мессенджерледе, социал сетледе джазмайдыла. Алай къуру да хыйлачыла этедиле.

КъЧР-ни МВД-ны пресс-къуллугъу.