Мындан алда Черкесскени 5-чи номерли орта школунда шахматладан «Белая ладья» деген бютеу Эресейде бардырылыучу эришиулени 3-чю регионал этапы болду. Ол орта билим берген школланы командаларыны арасында бардырылгъанды.

Турнирге эришиулени муниципал этапында хорлагъан, ёчлю орунланы алгъан 8 команда къошулгъанды. 32 джаш адам кючлерин, фахмуларын аямай, тирилик танытыб кюрешгендиле. Ол иш къыйын, ауур болса да, джашла бла къызла къолларындан келгенни этиб, хорламгъа учуннгандыла. Алай бла, алчыла белгиленнгенлеринде биринчи орунну Черкесскени 5-чи номерли школуну командасы алгъанды. Аны къурамында оруслула, къарачайлыла, черкеслиле, башха халкъланы келечилери биригиб, бютеу кючлерин салыб, команда хорламгъа ие болгъанды. Энди алагъа республиканы атындан Сочиде бардырыллыкъ ахыр эришиулени финалына къошулургъа эркинлик берилгенди.
Бизни чемпионларыбыз быладыла: Адам Экба (команданы капитаны), Батчаланы Сулейман, Братов Имран, Хутова Микаэла. Аланы Лепшокъланы Ахматны джашы Халис юретгенди.
Къарачай-Черкесияны Шахмат федерациясыны президенти Орусланы Арсен, турнирни баш сюдюсю, гроссмейстер Акъбайланы Казбек, хорлагъанланы, ёчлю орунланы алгъанланы джылы алгъышлаб, алагъа бютеу Эресей дараджада бардырыллыкъ эришиуледе да джетишимле, хорлам теджегендиле.
Эсигизге салайыкъ, озгъан 2025-чи джыл бардырылгъан быллай эришиуледе да 5-чи номерли школну командасы хорлагъан эди.

Узеирланы Хусей.