Арттотур (апрель) айны 13-ден 16-на дери Уфа шахарда 15-17 джыл болгъан джашла бла къызланы арасында бел тутушдан Эресейни биринчилиги ючюн эришиуле болгъандыла. Анга РФ-ны 28 регионундан 326 спортчу къошулгъанды.

Къарачай-Черкесияны спортчулары да, ол эришиулеге къошулуб, тюрлю-тюрлю дараджалы 15 медалгъа ие болгъандыла.
Алайды да, алтын медаллагъа Къалаханланы Арафат (50 килограмм), Ачабайланы Мурат (65 килограмм), Гочияланы Рустам (71 килограмм), Семенланы Айдамир (77 килограмм), Аппакъланы Асхат (95 килограмм) тыйыншлы болгъандыла.
Къоджакъланы Темирлан (50 килограмм), Байрамукъланы Амир (55 килограмм), Лайпанланы Исхакъ (65 килограмм), Джатдоланы Алим (71 килограмм) кюмюш медалла алгъандыла.
Джез медалла бла Эгизланы Амир (45 килограмм), Болурланы Руслан (55 килограмм), Къаракетланы Бештау (55 килограмм), Абдуллаланы Динислам (71 килограмм), Тотуркъулланы Артур (71 килограмм), Джуккаланы Динамин (85 килограмм) саугъаланнгандыла.
Эришиуледе биринчи, экинчи орунланы алгъанла Эресейни джыйым командасыны къурамында быйыл никкол (июнь) айда Узбекистанда бел тутушдан бардырыллыкъ дуния дараджалы эришиулеге къошуллукъдула.
Спортчуланы эришиулеге Лайпанланы Дахир, Хватыш Руслан, Джуртубайланы Осман, Чомаланы Джахар, Боташланы Руслан, Байкъулланы Аслан, Тотуркъулланы Ансар, Къаракетланы Али-Мурат, Байчораланы Пилял, Чомаланы Борис хазырлагъандыла.

(БИЗНИ КОРР.).