Мындан алда Черкесск шахарны «Юбилейный» спорт комплексинде гандболдан джаш къауумну арасында эришиуле ётдюле. Ала 2001-чи джылда аманлыкъчыланы къолларындан ёлген, МВД-ны Къарачай-Черкесияда бёлюмюню къуллукъчулары – милицияны подполковниги Сергей Ревенко бла милицияны майору Валерий Бойкону – сыйларына аталгъан эдиле.

Спортну бу тюрлюсюнден турнир 24-чю кере бардырылады. Анга Ставрополь, Краснодар крайладан эмда Къарачай-Черкес Республикадан бютеулей 10 команда къошулгъанды. Эришиуле башланырны аллы бла, алайгъа келгенле адетдеча, ёлген джердешлерибизни къабырларын джокъладыла. Алагъа сый бериб, гокка хансла салдыла.
Эришиулени аягъында эсеблени чыгъарыб, алчыланы белгиледиле. Джашчыкъланы арасында биринчи оруннга «Ставрополь – 2», экинчи оруннга «Ставрополь – 1», ючюнчю оруннга да Къарачай шахарны командалары ие болдула.
Къызчыкъланы арасында уа Краснодар крайны «Передовая – 1» командасы биринчи орунну, Къарачай шахарныкъы экинчи орунну, «Передовая – 2» къауумнукъу да ючюнчю орунну алгъандыла.
Эришиуледе алчы болгъан спортчу къызчыкъла бла джашчыкъладан сора да, эм тири вратарланы да белгиледиле. Алагъа башында сагъынылгъан ёлген къуллукъчуланы эт-джен адамлары саугъала бердиле. Дагъыда «Динамо» спорт бирлешликни ара советини атындан да саугъаладыла хорлагъанланы.
Былайда чертерге тыйыншлыды, эришиулени къураргъа эмда бардырыргъа МВД-ны КъЧР-де бёлюмю, КъЧР-ни Физкультура бла спорт министерствосу, «Динамо» республикан спорт бирлешлик, Гандбол спортну бизни регионда федерациясы болушхандыла.