Бу кюнледе Къарачай-Черкесияны Правительствосуну Председатели Мурат Аргунов Эресей Федерацияны Президентини бизни республикада адамланы джарсыуларына къарагъан джеринде (приёмныйине) тилеклери бла баргъан джердешлерибизге тюбегенди.

Премьер-министрни аллына баргъан джердешлерибиз социал инфраструктураны эмда кёбчюлюк хайырланыучу джерлени джарашдырыугъа къайгъыргъанларын айтхандыла.
Сёзден, Ногъай районну Эркин-Халкъ элинден келген, ол элде спорт площадка ишленсе деб, тилекчи болгъанды. Мурат Аргунов да, быйыл Эркин-Халкъда, 848 квадрат метр джерде, баскетбол, футбол, волейбол ойнарча джери да, санларын чыныкъдырыргъа джараулу кереклери да болгъан «акъыллы» спорт площадка къураллыгъын айтыб, аны къууандыргъанды.
Черкесскеде Светлая орамда 74-чю юйню къатындан Будённый атлы орамгъа дери, дагъыда Будённый орамда 1-чи номерли юйден ол Дорожныйге къошулгъан джерге дери асфальт тёшелсе деб баргъан адам да аллай тынгылы джууаб алгъанды. Къарачай-Черкес Республиканы Правительствосуну Председатели джолгъа къысха заманда къараллыгъына ышандыргъанды.
Дагъыда, алайда этилген оноугъа кёре, Гутякулов атлы орамда 22-чи номерли кёб фатарлы юйню башы джангыртыллыкъды.
Премьер-министр къайгъырыулу джердешлерибиз билдирген джарсыуланы барына да къараргъа джууаблы органлагъа борч салгъанды.