Фахмусуну, билимини джарыгъын таулагъа джая, халкъына къууанч келтирген онглу адамланы бири эди Батчаланы Хусейни къызы Тамара. Ол, хорламгъа, джетишимге къучагъын кенг кере, огъурлулукъну, игиликни ийнакълай, мийик кёкде кюмюш айгъа ушай джашагъанды. «Къарачай-Черкес автоном областны махтаулу артисти», «Къарачай-Черкес Республиканы халкъ артисти» деген сыйлы атланы джюрютгенди.
Тамара 1947-чи джыл арттотур (апрель) айны 20-да Узбек ССР-ни Баяут элинде туугъанды. Ташкент университетни тыш къраллы тиллени факультетине кириб окъуйду. Аланы юйдегилери туугъан джуртларына, Кавказгъа, къайтадыла. Мында аталарыны, аналарыны элинде, Даусузда, орналадыла. Таулу къыз, билимин андан ары ёсдюре, Пятигорск шахарда тыш къраллы тиллени институтуна кириб, 1981-чи джыл аны джетишимли тауусады. Бир талай джылны француз тилни устазы болуб ишлеб турады. Андан сора, 1992-чи джыл область драма театргъа барыб, анда къарачай труппада ишлеб башлайды. Аны сабий заманындан огъуна джыр, назму кеслерине тартханлай тургъандыла. Баяутда халкъны ауузунда джюрюген, унутулмайын джашауда орун алгъан «Кулина», «Хасаука» деген эмда башха халкъ джырла бла, аланы тарихлери бла шагъырей болады. Тутхан ишин бек сюйген, джууаблылыгъын терен сезген уста къыз комедия, драма магъанасы болгъан ролланы аламат ойнайды. Чыгъармачылыкъ бла кюрешген адамла аны тёгерегин алгъанлай тургъандыла. Ол къошулгъан спектакллеге адамла элледен, шахарладан да джыйылыб, сюйюб къарагъандыла. Аны комедиялы фахмусу тюрлю-тюрлю спектаклледе сейир кёрюннгенди. Аланы арасында Ануш («Ханума» А.Цагарели); Деянира («Трактирщица» Гольдони); Наня («Плутни Скапена» Мольера); Луковая принцесса («Бременские музыканты» В.Шульжик); Беззащитная Елена (Б.Нушич) эмда башха ролларын айырыб айтыргъа боллукъду. 1994-чю джыл Тамарагъа, театр санатны ёсюмюне къошхан юлюшю ючюн, «Къарачай-Черкес автоном областны махтаулу артисти» деген сыйлы ат берилгенди. Ол республикада, къралда бардырылгъан джамагъат ишлеге да тири къошулгъанлай тургъанды. Аны Бесланда болгъан трагедиягъа аталыб джазылгъан назмуларын анда школну къабыргъаларына джабышдыргъандыла. Тамараны 2010-чу джыл назмуладан къуралгъан «Лунная слеза» деген джыйым китабы басмадан чыкъгъанды. Таулу къыз, билимин ёсдюре, джангы джетишимлеге ие бола, таукел алгъа баргъанды. 2010-чу джыл «Где эдельвейсы цветут» деген поэмасы басмаланады. Ол джыл огъуна «Къар юсюнде джюрек ызла» деген назму китабы дунияны джарыгъын кёреди. 2013-чю джыл а, «Глазами сердца моего» деген назму китабы чыгъады. Анга 2002-чи джыл «Къарачай-Черкес Республиканы халкъ артисти» деген сыйлы ат аталады. Джумушакъ тилли, таза иннетли, ашхы актрисаны адамла бек джаратхандыла, сюйгендиле. Ол да, ала бла арасын джылы этиб, кесини ролларыны кючю бла, аланы сейирликге бёлегенлей тургъанды. Фахмусуну, билимини ашхы кючюн кёблеге чомарт чача, джюрек джылыуун джуртуна джая, халкъына халал къуллукъ этгенди. Аны джырларын республиканы белгили артистлери джырлагъанлай тургъандыла.
Тамара, тутхан ишине кертилик таныта, 1980-чы – 2015-чи джыллада Къарачай драма театрны актрисасы, поэтесса, педагог, джамагъат къуллукъчу болуб тургъанды.
Ол 2015-чи джыл элия (июль) айны 27-де ауушханды, джандетли болсун.
Батчаланы Тамара, халкъыбызны адабиятын, маданиятын айныта, кертиликни, шохлукъну джолун джарыта, адамлагъа игилик излей джашагъанды.
Лепшокъланы Хусеин.
