Бу кюнледе Зеленчук станседе «Новое поколение» деген джаш тёлю аралыкъда Эресейни МВД-ны кърал автоинспекциясыны 90-джыллыгъына аталгъан акция ётгенди. Анга районну школларыны сохталары къошулгъандыла.

Ол акцияны Эресейни МВД-ны Зеленчук районда бёлюмюню кърал автоинспекциясыны къуллукъчулары, Зеленчук районну администрациясыны физкультураны, спортну, туризмни, джаш тёлю политиканы хакъындан бёлюмю, «Новое поколение» деген джаш тёлю аралыкъ бирге къурагъандыла.
Эресейни МВД-ны Зеленчук районда бёлюмюню кърал автоинспекциясыны джолда джюрюуну къоркъуусузлугъуну пропагандасыны хакъындан инспектору Анастасия Кубахова сохталагъа ГАИ-ни тарихинден, ишинден хапар айтханды, джолда джюрюуню джорукъларын эсгертгенди. Инспектор айтхандан, полицияны къуллукъчулары, сабийле бла тюбешиб, ангылатыу-юретиу ушакъла бардырыла турсала, ала джорукълагъа теренирек эс бёледиле, джууаблылыкъларын ангылайдыла.
Акцияны тамалында аквагрим площадка да къуралгъан эди. Анда сохтала къоркъуусузлукъ бла байламлы оюмларын суратлада кёргюзгендиле. Ызы бла ала тепсеу флешмобха къошулгъандыла.
Джыйылыуну ахырында сохталагъа татлы саугъала, кече джарытхан белигиле, джолда джюрюуню джорукълары джазылгъан къагъытла берилгендиле.

САЛПАГЪАРЛАНЫ У.