Быйыл Эресейни Ич ишлени хакъындан министерствосуну Ветеранларыны совети къуралгъанлы 35 джыл болады. Аны къурамына, антларына кертилик таныта, МВД-да махтаулу къуллукъ этиб, тыйыншлы солуугъа чыкъгъандан сора да, къралыбызны рахатлыгъын сакълаугъа къайгъыргъан адамла киредиле.
Аллай бирлешлик бизни республикада да барды. Бюгюнлюкде Къарачай-Черкесияны МВД-ны Ветеранларыны советине ич къуллукъну отставкадагъы полковниги Темрезланы Азрет-Алийни джашы Юрий башчылыкъ этеди.
Темрез улу гитчелигинден огъуна милицияда къуллукъ этерге талпыб ёсгенди. 1978-чи джылны ахыр сюреминде, къралгъа аскер борчун бериб къайтхандан сора, ол сабий нюзюрюн толтурур джанындан къагъыт джарашдырыб башлагъанды. 1984-чю джыл байрым (февраль) айда Юрийни милициягъа ишге алгъандыла. 30 джылны таймаздан ол къралына, халкъына хакъ къуллукъ этгенди. Къуллукъ борчларын махтаулу толтургъаны бла чынын да полковникге дери ёсдюргенди.
Этимли, джорукъну сакълаугъа бек болгъан полковникни «За доблесть в службе» эмда «За отличие в службе» деген медаллары, «Участник боевых действий» бла «Отличник милиции» деген хурмет белгилери дагъыда башха кърал саугъалары кёбдюле. Темрезланы Юрийге «Заслуженный сотрудник органов внутренних дел Карачаево-Черкесской Республики» деген ат да берилгенди. Ол бары да Темрез улу джорукъну, къоркъуусузлукъну сакълар ючюн уллу къыйын салыргъа кереклисин билген, сынамлы адам болгъанына шагъатлыкъ этеди.
Темрезланы Юрий башчылыкъ этген организацияда, тамам аныча, туугъан джуртубузда джамагъат-политика болумну игилендириуге джан аурутхан адамла бардыла. Ала бары да, кюн сайын дегенча, джаш полициячылагъа ашхы сынамларындан юлюш эте, джаш тёлюге патриот сезимлени сингдире джашайдыла.
КъЧР-де МВД-ны Ветеранларыны советини къурамында 580 адам барды да, аланы бири да бош турмайды. Бир къаууму, ВУЗ-лада, СУЗ-лада тюбешиулеге къошулуб, джаш тёлюню тюз джолда барыргъа кёллендиреди, орта школлада Джигитликни дерслерин береди, бирсилери ёлген иш нёгерлерини юйдегилерине болушадыла, башхалары СВО-гъа гуманитар джюк джыйышдырадыла. Чомартлыкълары да бюсюреу этерчады. Сууаб ишлерине ала кеслерини пенсияларын джоядыла. Къысхасыча айтсакъ, «ох» деб, солур орнуна, ала энтда да сафдадыла.
Эресейни Ич ишлени хакъындан министерствосуну Ветеранларыны советини 35-джыллыкъ юбилейин иги белгилер мадарлары бола тургъанлай, ала аскер къаугъа бардырылгъан заманда сабыр болургъа, байрамлары бла байламлы араларында тирилик танытханлагъа, ала бла иш джюрютгенлеге Разылыкъ къагъытла, медалла бергенден башха джукъ этмезге деб оноулашхандыла. Юбилей аланыкъы болса да, Разылыкъ къагъыт «Къарачай» газетни редакциясына да берилгенди.
КъЧР-ни МВД-ны Ветеранларыны советини атындан Темрезланы Юрий: «Газетни окъуйбуз, бек багъалатабыз. Республикада магъаналы ишлени юслеринден джазгъанлай турасыз. Тарихибизни эсгертесиз, миллетибизни онглу адамларын юлгюге тутасыз. Окъуучуланы ветеранланы ишлеринден хапарлы этиб тургъаныгъыз ючюн а айырыб разылыгъыбызны билдиребиз.
«Къарачай» газетни чыгъаргъанланы барына да саулукъ-эсенлик, чыгъармачылыкъда уллу джетишимле, сейир материалла теджейбиз.
«Къарачай» тюзлюкге джол кёргюзген белги болсун!» – деб джазылгъан Разылыкъ къагъытны бергенинде, сынамлы, онглу адамладан бюсюреу табханыбызгъа барыбыз да бек къууандыкъ.
Биз да, ветеранланы юбилейлери бла алгъышлай, алагъа мындан ары да узакъ заманны джамагъатха джараулу ишлерин джетишимли баджарыргъа кюч-къарыу теджедик. Аллах аланы ашхы муратларын толтурсун, джашауларын рахат ётдюрюрге буюрсун!
БАЙРАМКЪУЛЛАНЫ Зульфия.
