Къарачай-Черкес кърал университетни пресс-къуллугъу билдиргенден, Орус география джамагъатны Къарачай-Черкес регионал бёлюмюне РГО-ну биринчи вице-президенти академик Николай Касимовдан Бюсюреу письмо келгенди.

«Лучшей площадке Географического диктанта 2025» деб, ол мийик саугъа регионал бёлюм конкурсда ёчлю орунну алгъаны ючюн берилгенди.
Эсигизге салайыкъ, Къарачай-Черкес кърал университет РГО-ну джергили бёлюмю бла бирге, аны юбилей джылында, окъуу-билим джайгъан акция бардырыргъа джараулу юч аламат площадка къурагъанды. КъЧКъУ-ну табигъат-география факультетинде РГО-ну конференцзалында ачылгъан КъЧР-де ара площадка болгъанды. Табигъат бла тарихни сюйгенлеге да Чууана тауда бир, Къарачай шахардан узакъ болмай Мара ёзенде «бышлакъ» дорбунлада да бир площадка ишлейдиле.
«Ол джетишим бу диктантны къурагъанланы, бардырыргъа болушхан волонтёрланы, кеслерини билимлерин сынагъанланы барыны да хорламыды. Сау болугъуз, географияны сюйгенигиз ючюн!» – дегенди РГО-ну КъЧР-де бёлюмюню тамадасы Тохчукъланы Шамиль.
Ол чертгенден, «География диктант» къралла арасы окъуу, билим джайгъан акцияды. Орус география джамагъат аны джыл сайын да бардыргъанлай турады. Аны баш мураты географияны билирге кёллендириудю эмда Эресейни географиясына адамланы эслерин бёлдюрюудю.

(Бизни корр.).