2026-чы джылны ал юч айында Къарачай-Черкесияда, интернетни хайырландырыб, ёнгкюч ачха (займла) алыргъа излегенлени къагъытларын джарашдыргъан кёзюуде этилген хыйла ишле кёбюрек болгъандыла.

Алайды да, юч айны ичинде интернетни юсю бла тюрлю-тюрлю микрофинанс организациялада башха адамланы атлары бла ёнгкюч ачха алыннганы бла байламлы 31 терслеу иш ачылгъанды.
КъЧР-ни Ич ишлерини министерствосуну Дознание бёлюмю адамланы сакълыкъгъа чакъырады:
– интернетде ким бла сёлешсегиз да къоркъуусузлукъну мадарларын унутмагъыз, кесигизни энчи хапарыгъызны айтмагъыз. Паспортугъузну суратын амалсыз иерге керек эсегиз, аны сериясы бла номерин кёргюзмей алай суратха алыгъыз;
– паспортугъузну тыш адамла хайырланалмазча джерде тутугъуз;
– паспортну копиясын башха адамгъа бергенигиз болса, юсюне «Не для получения кредита/займа» деб джазыгъыз.
– кесигизни неда джууукъларыгъызны паспортларыны суратлары болгъан телефонугъузну башха адамгъа хайырланыргъа берсегиз, данныйлери болгъан суратланы кетериб къоюгъуз. Телефонну сатсагъыз да ичин толусу бла тазалагъыз;
– сиз хыйлачыланы «къапханларына» тюшсегиз, аны бла байламлы ишлени эсигизде тутаргъа кюрешигиз, бир-биригизге ийген СМС-ни скриншотла этигиз, не да этиб информацияны сакълагъыз. Андан сора къысха заманны ичинде джорукъ сакълагъан органлагъа барыб, хапарыгъызны айтыгъыз, аны бла бирге аманлыкъчыны ачыкъларгъа болушургъа хазыр болугъуз.

КъЧР-ни МВД-ны пресс-къуллугъу.