Къарачай-Черкесияны спортчулары 4 медаль бла Эресейни биринчилигине къошулургъа 1 путёвка алгъандыла.

Арттотур (апрель) айны 5-ден 11-не дери Невинномысск шахарда Эресейни Джигити подполковник М.А. Миненковну ёчлери эмда ВДВ-ны башчылыгъыны кубогу ючюн джумдурукъ тюйюшден уллу эришиуле бардырылгъандыла. Ол эришиулеге къралыбызны 17 регионундан 17-18 джыл болгъан 126 спортчу къошулгъанды. Спортну ол кюрешинде къарыуларын сынаргъа излегенлени араларында Къарачай-Черкесияны келечилери да болгъандыла.
Ала, кеслерини ауурлукъларында иги тюйюшюб, атларын махтау бла айтдыргъандыла. Ауурлукълары 67 килограмм болгъан спортчуланы барын хорлаб, Тохчукъланы Шамиль биринчи орунну алгъанды.
Эриккенланы Хамит, Саид Абитов, Ислам Марзиев да кеслерини ауурлукъларында 3-чю орунлагъа тыйыншлы болгъандыла.
Бу джол хорламлы болгъан спортчулагъа джумдурукъ тюйюшден Эресейни биринчилиги ючюн хычаман (май) айда Калининград шахарда ётерик эришиулеге къошулургъа путёвкала берилгендиле.
Алай бла, Тохчукъланы Шамилге кърал дараджалы эришиулеге къошулургъа джол чыкъгъанды.
Джетишимли спортчуланы джумдурукъ тюйюшге белгили тренерле Къаракетланы Руслан, Халкёчланы Эльбрус, Шамель Гоншоков, Али Дзамыхов, Каппушланы Азамат, Азамат Хачуков эмда Рамазан Хачуков юретгендиле.

(БИЗНИ КОРР.).